E Mëttwoch de Moie war den Direkter vum Zentrum fir politesch Bildung eisen Invité vun der Redaktioun.

An där Form hu mer dat nach net hei kannt! Dat sot den Direkter vum Zentrum fir politesch Bildung, Marc Schoentgen, am RTL-Interview am Kontext vun de Gewalt-Eskalatioune bei de Corona-Manifestatiounen. Et hätt een awer kënne matkréien, datt sech Deeler vun den Demonstrante radikaliséiert hunn, mee dass et zu punktuellen Ausschreidunge kënnt, hätt een natierlech net viraussoen kënnen. Mee an anere Länner an och op de sozialen Netzwierker hätt een dat och kënne beobachten, dofir wier et eigentlech just eng Fro vun der Zäit gewiescht, bis dass och hei am Land esou eppes géing geschéien. De Sujet misst elo och mat Jonken diskutéiert ginn, déi sech natierlech och vill Froe géinge stellen.

Si Jonker iwwerhaapt nach u Politik interesséiert?

Jonker sinn dorunner interesséiert wat dobausse lass ass, ma et wieren éischter déi klassesch Forme vun der politescher Participatioun an dem politeschen Interessi, déi géingen zeréckgoen. Wann een zum Beispill jonk Leit elo géing froen, wat eng Demokratie wier, wat d‘Parlament géing maachen oder wat een Deputéierte wier, da wiere si natierlech deelweis iwwerfuerdert, mee si wieren awer interesséiert u politeschen a gesellschaftlechen Theemen, besonnesch wann et si direkt concernéiert. Da wär och d'Bereetschaft ze diskutéieren an d'Nofro vill méi héich, an dem misst och an de Schoule Rechnung gedroen ginn, erkläert de Marc Schoentgen.

"Mir si keng Pompjeeën"

Den Zentrum fir politesch Bildung kéint och net der Aktualitéit all Kéiers hannendru lafen. Hir Aufgab wier eng edukativ a preventiv Aarbecht, sou den Invité. De Jonke misst een e Verständnis vun Demokratie a Grondrechter vermëttelen, fir datt si d'Aktualitéit richteg aschätze kënnen. Och d'Medienerzéiung wier eng vun de Kärkompetenze vun der politescher Bildung. Et wier awer eng laangfristeg Aarbecht. D'Offer vum Zentrum fir politesch Bildung viséiert virun allem Jonker, well een do nach een Impakt hätt. Déi politesch Bildung an d'Sensibilisatioun misst  dofir och méiglechst fréi geschéien. Ma natierlech wier een och do, fir Erwuessener eppes mat op de Wee ze ginn, a fir déi ze erreechen, géing een nieft de Printmedien virun allem digital op déi sozial Medie setzen.

Invité vun der Redaktioun: Marc Schoentgen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.