E Méindeg de Moie war d’Presidentin vum Ethikrot eis Invitée vun der Redaktioun.

Bal zwee Joer Pandemie hätten eng polariséierend Wierkung. D'Leit wieren dann entweder ganz fir oder ganz géint eppes. Dat wier awer net just beim Sujet Pandemie esou, mä och bei Diskussiounen ëm den Ëmweltschutz, Demokratie oder d'Liewensgestaltung. Automatesch, wann d'Welt géing op d'Kopp gedréint ginn, da géingen d'Leit no Repèrë sichen a soulaang Dialog tëscht deene ganz verschiddene Repèrë wier, wier et och nach keng Katastroph. Eng Katastroph wier et eréischt, wann d'Fronte sou verhäert sinn, dass déi eng net méi mat deenen anere schwätzen. Dat sot d'Julie-Suzanne Bausch, Presidentin vun der nationaler Ethikkommissioun. Si war eis Invitée vun der Redaktioun.

E Probleem an deem Kontext wieren och d'sozial Medien, wou jiddereen alles kann ongefiltert publizéieren. D'Chance vun de sozialen Medien, nämlech déi extrem Expressioun, hätt als Géigepart och, dass alles vermëscht ass a keen Tri méi géing gemaach ginn.

Impfflicht ass gebonnen un d'Situatioun an de Spideeler

Déi national Ethikkommissioun hat sech jo an engem Avis dofir ausgeschwat, fir iwwer eng Impfflicht fir Erwuessener hei am Land nozedenken. Den Haaptkrittär do géif d'Situatioun an de Spideeler bleiwen. D'Gestes barrières a eben de Vaccin wieren déi eenzeg Méiglechkeeten, fir ze evitéieren, datt d'Spideeler iwwerlaascht ginn. Eng Impfflicht wier awer keng einfach Decisioun fir d'Politik, dowéinst wier et laang keen Thema gewiescht.

Impfflicht dierft een och net mat Impfzwang verwiesselen. Flicht wier, wann een e Protokoll riskéiert, well een net geimpft ass. Zwang wier, datt ee forcéiert gëtt sech ze impfen, also d'Iwwerwältege vum Mënsch a senger physescher a psychescher Integritéit, sou nach d'Julie-Suzanne Bausch, Presidentin vun der nationaler Ethikkommissioun.

Mam Sujet Kannerimpfunge gëtt vum eigentlechen Debat ofgelenkt

An der Debatt ronderëm d'Kannerimpfungen hätt een d'Gefill gehat, dass domat soll vun der Impfflicht fir Majeuren, also Leit iwwer 18 Joer, ofgelenkt ginn. Vu Kannerimpfungen ze schwätzen, wier ee sensibelt Thema, mä domat géing vun der Verantwortung vun den Erwuessenen ofgelenkt ginn, genee wéi wann ee vu Leit géing schwätzen, déi sech net kënnen impfe loossen, och domat géing ëmmer nees vum eigentleche Sujet ofgelenkt ginn. Nämlech, dass wann all Majeur hei am Land sech géing impfen loossen, da misst ee weder vun Impfunge fir Jugendlecher an nach manner vun Impfunge fir Kanner schwätzen, sou d'Presidentin vun der nationaler Ethikkommissioun.

Invité vun der Redaktioun: Julie-Suzanne Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.