E Mëttwoch de Moien war den ADR-Deputéierte Fred Keup eisen Invité vun der Redaktioun.

Mir wäerten dat neit Covid-Gesetz net matstëmmen, well et géif rëm eng Kéier ze wäit goen. Dat sot den ADR-Deputéierte Fred Keup e Mëttwoch de Moien am RTL-Interview.

Mesurë wéi den 2G am Fräizäit-Beräich zum Beispill géife kee Sënn erginn. Sou wier et zum Beispill falsch, datt Leit, déi en negativ Test hunn, net däerfen an de Restaurant. Et wier e schwéiere Spagat, mä et misst ee verschidde Grondrechter respektéieren. Tester, an zwar gratis, missten och eng Méiglechkeet bleiwen.

D'ADR wier awer och fir en héijen Impftaux an datt sech d'Leit impfen. Ma et misst een awer op Fräiwëllegkeet setzen a respektéieren, wa Leit sech net wëllen impfe loossen.

Déi aktuell Situatioun an de Spideeler wier normal am Wanter, esou de Fred Keup. D'Klinicke wieren och scho viru Corona ze no un de Limitte gewiescht. Dat wier e Probleem vun enger schlechter Gesondheetspolitik iwwer Joren.

Wat d'Policeinterventioun bei de Corona-Manifestatiounen ugeet, huet den ADR-Deputéierte Keup kritiséiert, datt déi demesuréiert gewiescht wier. Och wann ee virdrun net gewosst hätt, wéi vill Demonstrante kommen, dat gëtt de Fred Keup zou, wär ze vill Police do gewiescht. Ob e Waasserwerfer hätt missen agesat ginn, wär och d’Fro. Nëmme e ganz klengen Deel vun den Demonstranten hätt randaléiert. D’ADR wär natierlech awer och fir eng staark Police an eng staark Policepresenz.

Déi provokant Aussoen vum ADR-Deputéierten Roy Reding huet de Fred Keup e Feeler genannt. Dat hätt de Roy Reding och agesinn an an der Chamber gesot. Esou eppes dierft net méi virkommen, et misst een oppassen, wat ee seet.

Invité vun der Redaktioun - Fred Keup

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.