E Mëttwoch de Moien war den neien CSV-Deputéierten eisen Invité vun der Redaktioun.

An engem knappe Mount gëtt de Max Hengel neien CSV-Deputéierten an ersetzt domat d'Françoise Hetto-Gaasch an der Chamber. De fréiere Wuermer Buergermeeschter a momentane Schäffe wäert wéi et ausgesäit d'Kommissiounen an de Beräicher Santé, Interieur, Logement an Educatioun vun der Deputéierter iwwerhuelen. Doriwwer eraus wëll de Papp vun 2 Kanner sech awer och am Klima- an Ëmweltschutz engagéieren.

Hie wëll no bei de Leit an am Kontakt mat dëse sinn. Fir hien ass et wichteg, datt d'Leit net onbedéngt mussen hiert Duerf verloossen a wäit fueren, fir bestëmmte Servicer kënnen an Usproch ze huelen. De Policebüro zu Wuermer ass zum Beispill schonns zougaangen, d'Post wäert och zougoen. Wie Geld wëll ophiewen, muss bis op Gréiwemaacher oder Réimech fueren. D'selwecht gesäit et mat der lokaler Gesondheetsversuergung am Osten aus, wou et den Ament keng Maison médicale gëtt. Hei soll eng medezinesch Versuergung assuréiert ginn. Projete ginn et awer schonns fir Gréiwemaacher a Jonglënster.

Zu der Affär Asbl CSV-Frëndeskrees wollt de Max Hengel net am Detail kommentéieren, ob eng Denonciatioun beim Parquet néideg war oder net. Jiddereen huet senger Meenung no awer no beschtem Wëssen a Gewësse gehandelt. D'Affär misst elo ausdiskutéiert an de Memberen erkläert ginn. Lo wier et fir d'Partei awer Zäit, Zukunftsperspektiven ze bidden an net éiweg an der Vergaangenheet ze wullen. D'Pandemie hätt dozou gefouert, datt aner Dossiere leie bliwwe wieren. D'CSV hätt awer vill Themen, wou se an de leschte Jore Propose gemaach huet. Dat géing vu Logement iwwer Educatioun, Santé an Ëmwelt. Am Kontakt mat de Membere misst een elo Prioritéite verankeren.

Zum Renouveau vun der Partei géingen nei Gesiichter gehéieren. An hie wier eent dovunner. Et misst awer all Deputéierte selwer decidéieren, wéini Zäit wier, fir fir e jonke Member Plaz ze maachen. Schliisslech wiere se jo dohinner gewielt ginn.

De jonke Politiker wëll 2023 bei de Gemengewalen erëm als Buergermeeschter kandidéieren, ass awer frou doriwwer, elo just Schäffen ze sinn, fir sech op säi Mandat als Deputéierte kënnen ze konzentréieren.

Invité vun der Redaktioun: Max Hengel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.