E Mëttwoch de Moie war de Wëssenschaftsjournalist eisen Invité vun der Redaktioun.

"Mir sinn an enger Course dran, mee mir wëssen net wou d'Zil ass a wéi vill Bierger nach kommen", esou huet de Chefredakter vu science.lu Jean-Paul Bertemes de Kampf géint d'Pandemie den Ament beschriwwen. Wat een awer beaflosse kéint, wier d'Vitess, mat där mer an der Course lafen.

D'Endzil wier eng breet Immunitéit. Lo ass d'Fro, wéi komme mer dohinner, sou de Jean-Paul Bertemes.

D'Impfunge wieren ee Moyen, fir dës Immunitéit z'acceleréieren, esou de Jhemp Bertemes. Deen anere Wee wier op eng Durchseuchung duerch Infektioun ze waarden, do misst een awer parallel ëmmer nees aner Mesuren huelen, fir e "flatten the curve" ze maachen, also fir d'Neiinfektioune kleng ze halen. Déi Fro misst ee sech och bei der Impfflicht stellen, sou de Wëssenschaftsjournalist: si mer bereet nach ze waarden? Oder wëlle mer séier um Zil ukommen?

Hien hätt vill Versteesdemech fir Leit, déi Ängschte wéinst der Impfung hätten. D'Pandemie wier awer e kollektive Phenomen, dowéinst bréicht et och eng kollektiv Léisung. Datt all Eenzelen net domat d'Accord wier, kéint een net verhënneren.

Iwwer Datumer, wéini d'Pandemie eriwwer kéint sinn, sollt also net spekuléiert ginn. Et wier awer net gutt, Verspriechen ze maachen, déi een dann net kéint halen. Villes wier net gewosst. Och zu der neier Variant Omikron hätt een nach net genuch Daten. D'Mutatioun wier awer warscheinlech net sou vill manner virulent, datt ee kéint op d'Durchseuchung setzen.

De Wëssenschaftsjournalist steet tëscht der Wëssenschaft an der Gesellschaft, seng Roll wier et, fir ze kommunizéieren an ze iwwersetzen, wat d'Fuerscher fuerschen. Mir deele mat, wat d'Wëssenschaft weess a wat se net weess, a klären op iwwer d'Prozesser, sou nach de Jhemp Bertemes.

Invité vun der Redaktioun: Jean-Paul Bertemes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.