E Méindeg de Moie war d'ADR-Politikerin eis Invitée vun der Redaktioun.

D’ADR seet se wier fir Fräiheet an der Press, mee géint perséinlech Attacken. D'ADR Politikerin Sylvie Mischel huet e Méindeg de Moien hei op RTL d'Demarche vun hirer Partei verdeedegt fir eng Plainte géint den Tageblatt-Chefredakter Dhiraj Sabharwal ze maachen. Deen hat d'ADR-Députéiert Fernand Kartheiser a Fred Keup am RTL-Presseclub de virleschte Sonndeg als "nidderträchteg Knaschtsäck" bezeechent. D’Sylvie Mischel huet deklaréiert, d'ADR wier fir Fräiheet an der Press, mee och an de soziale Medien. Par konter wieren d’Aussoe vum Dhiraj Sabharwal eng "privat Attack" gewiescht.

"Wann den Här Sabharwal seet den Här Keup an den Här Kartheiser sinn hannerhälteg Knaschtsäck, (...) da setzt hie sech jo net ausernee mat der Politik vun der ADR", sou d’Sylvie Mischel. Et wier ee "schlechte Stil" an en "Niveau", deen een esou net zu Lëtzebuerg wéilt. An hiren Ae géing d’ADR mat enger Plainte och keen "Drock" maachen. Dorobber ugeschwat wéi si viru méi ewéi zwee Joer eng Foto vum Ausseminister mat Asyldemandeuren op Facebook gedeelt hat mat der Suggestioun d’LSAP kéint déi Foto als Walplakat huelen. Dozou sot d’Sylvie Mischel dat géing ënnert "politesch Ausernanersetzung" falen. Si hätt do jo net hir perséinlech Meenung iwwert de Jean Asselborn ausgedréckt.

Och d’Participatioun vun der ADR u Manifestatioune bei deenen och Leit dobäi sinn, déi oppe rassistesch Aussoe maachen oder zu Gewalt opruffen, wier am Beräich vum fräie Meenungsausdrock. "Déi Manifestatiounen, déi hunn halt e breede politesche Spektrum", sou d’Sylvie Mischel. Si huet op fréier Membere vun der Kommunistescher Partei a vun de Piraten higewisen, déi dobäi sinn, mee zouginn och "een oder zwee Leit aus deem Spektrum, deen Dir genannt hutt". Et géing hirer Meenung no bei de Maniff’en awer ëm d’Coronapolitik goen an net wéi eng perséinlech politesch Astellung een hätt. D’ADR wier och géint Manifestatiounen, déi ewéi déi vun e Samschdeg net ugemellt waren a Manifestatioune missten "gewaltfräi" sinn. D’ADR géing sech deemno kloer vum radikalen "Bloc Lorrain" distanzéieren.

D’Sylvie Mischel huet och ugekënnegt, datt d’ADR d’Evenementer vun e Samschdeg op der Gare an der Partei wäert auswäerten an eng urgent parlamentaresch Fro un de Policeminister Henri Kox stellen.

Invité vun der Redaktioun: Sylvie Mischel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.