En Dënschdeg de Moie war d'Delphine Dethier vum Cell eis Invitée vun der Redaktioun.

Mir gesinn zanter e puer Joren eng Zort «green-washing»: Mesuren, déi deemno besser ausgesinn wéi se et am Endeffekt wierklech sinn. Mam neie Klima Biergerrot wier et änlech. Dat sot eng skeptesch Co-Coordinatrice vum Cell, dem Center for ecological learning, d’Delphine Dethier, en Dënschdeg de Moien um RTL.  D’Regierung huet jo virun 2 Wochen en neie Klima Biergerrot an d’Liewe geruff, dee soll Léisungen an Alternative proposéieren a soen wéi wäit ee bereet wier am Klimaschutz ze goen.

D’Delphine Dethier freet sech, ob hei mat demokratesche Mëttele gespillt gëtt an ob mat deem neie Gremium wierklech eppes soll ëmgesat ginn. Si ka sech souguer virstellen, datt de Biergerrot eng Zort Walkampf-Taktik vum Premier kéint sinn, well de Xavier Bettel de Biergerrot esou spéit an der Legislaturperiod op eemol ugekënnegt huet.

Dobäi wier et wichteg, datt sech elo konkret eppes deet, sou d’Delphine Dethier. Lëtzebuerg, e Land mat engem groussen ekologesche Foussofdrock, kéint e Motor sinn. Mä da misst een ophalen ëmmer nëmme «realistesch» z'iwwerleeën an et bräicht een eng nei Mentalitéit oder «en neie Wee fir ze denken».

De CELL organiséiert selwer zanter Jore Klima-Biergerversammlungen. Jalous wier een net op de neie Klima Biergerrot am Géigendeel. D’Delphine Dethier sot et géing een en och ënnerstëtzen. Mä änlech Initiativen am Ausland hätte gewisen, datt d’Participante vun esou enger Biergerbedeelegung dacks frustréiert erauskommen.

Invité vun der Redaktioun: Delphine Dethier

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.