En Donneschdeg de Moie war de Mënscherechtsaktivist Jean-Louis Zeien eisen Invité vun der Redaktioun.

Den 31. Mäerz 2022 geet d'Weltexpo zu Dubai op en Enn. Och Lëtzebuerg war mat engem Pavillon do vertrueden. E puer mol ware Lëtzebuerger Delegatiounen do op Visitt, dorënner och Ministeren. De Mënscherechtsaktivist Jean-Louis Zeien huet déi Participatioun en Donneschdeg de Moien um Radio kritiséiert. Hie war eisen Invité vun der Redaktioun. Déi Vereenten Arabesch Emiraten stinn ëmmer nees wéinst Mënscherechtsverletzungen um Pranger. Fraerechter, Pressefräiheet, Mënschenhandel an Zwangsaarbecht wäre reegelméisseg Themen a Rapporte vu Mënscherechtsorganisatiounen. An nohalteg wär dës Expo allemol net gewiescht, obwuel Eent vun den Haaptthemen d‘Nohaltegkeet war, esou de Jean-Louis Zeien. Eng Weltausstellung kéint awer natierlech och flott nei Innovatioune weisen, mä hie géing alt hoffen, dass bei der nächster Expo 2025 zu Osaka a Japan net nëmme grouss multinational Betriber an d'Vitrinn gestallt ginn, wéi dat déi Kéier de Fall war.

Hypokrisie am Ëmgang mat de Vereenten Arabeschen Emiraten

Soll ee Business mat Staate maachen, déi d‘Mënscherechter mat Féiss trëppelen? Dat war e Mëttwoch dann och e Sujet an der Chamber. Do wär net vill Konkretes dobäi erauskomm, ma den Aktivist fuerdert awer, dass d‘Principes directeurs vun de Vereenten Natiounen am Beräich Business a Mënscherechter missten applizéiert ginn. Wann ee vun den Entreprisen am Privatsecteur erwaart, dass se sech un ee Reegelwierk halen, da misst ee sech selwer och doru moossen.

Et misst een oppassen, dass een net an eng Hypokrisie géing verwéckelt ginn, esou de Jean-Louis Zeien. Op der enger Säit géing ee nämlech soen et dierft een net méi mat Russland handelen, well si Krich géint d'Ukrain féieren. Anerersäits wären och d‘Emiraten an enger Krichskoalitioun géint de Jemen am Jemen verwéckelt, wou och Spideeler, Schoulen an d'Zivilpopulatioun bombardéiert ginn.

Dumping vun ale Cargo-Schëffer an aarme Länner muss ophalen

De Generalsekretär vun der Kommissioun Justice et Paix huet um Donneschdeg Moien och iwwer d’Hongkong-Konventioun geschwat, déi e Mëttwoch an der Chamber gestëmmt gouf. Domadder soll an Zukunft garantéiert ginn, dass Schëffer, déi ënnert dem Lëtzebuerger Pavillon maritime fueren, ëmweltfrëndlech recycléiert ginn. Meeschtens landen al Cargo-Schëffer an südasiatesche Länner wéi Bangladesch, Indien oder Pakistan, wou duerch hir Entsuergung d‘Waasser vergëft gëtt an d‘Aarbechter ënner liewensgeféierleche Konditioune musse schaffen. Am Bangladesch wären zejoert op d‘mannst 14 Aarbechter beim sougenannten Ofwracke vu Schëffer ëm d‘Liewe komm, gëtt de Jean-Louis Zeien ze bedenken. Och 3 Schëffer, déi ënnert dem Lëtzebuerger Pavillon maritime gefuer sinn, goufen esou entsuergt.

Dofir fuerdert d‘Kommissioun Justice et Paix, dass Lëtzebuerg seng Hausaufgabe soll maachen. Am leschte Koalitiounsaccord géing stoen, et wéilt een „green shipping“ promouvéieren. Dovun hätt ee bis haut nach näischt gesinn. Donieft soll Lëtzebuerg sech dofir asetzen, dass bei der nächster EU-Direktiv och d‘Schëfffaart als Risiko-Beräich fir d‘Mënscherechter soll gëllen. Do kéint een och national beim maritimmen Aarbechtsrecht nach eemol nobessere fir op d‘mannst ze garantéieren, dass op de ronn 200 Schëffer déi ënnert dem Lëtzebuerger Pavillon maritimmen duerch d'Welt fueren, d‘Aarbechtsbedéngunge besser ginn, sou de Jean-Louis Zeien

Invité vun der Redaktioun: Jean-Louis Zeien

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.