E Mëttwoch de Moie war de gréngen Energieminister eisen Invité vun der Redaktioun.

"Energiesanktioune sinn dat, wat de Putin am meeschten trëfft." Dat sot den Energieminister Claude Turmes am RTL-Interview. Hie war e Mëttwoch de Moien eisen Invité vun der Redaktioun. Lëtzebuerg kéint op deem Plang awer net virdrécken, mä et wéilt een eng europäesch Léisung fannen.

Lëtzebuerg géing zwar quasi kee Gas aus Russland bezéien, huet den Energieminister Claude Turmes betount. Et géing een éischter aus der Belsch beliwwert ginn. Energiesanktioune missten awer op europäeschem Niveau gutt iwwerluecht sinn, esou de Minister.

Wat d'Kuel ugeet, wier et schonn decidéiert. Dat wier zu Lëtzebuerg kee Problem, well mir bal keng Kuel méi benotzen. Beim Pëtrol an Diesel misst ee sech an anere Länner ëmkucken.

Do, wou déi europäesch Wirtschaft allgemeng méi Konsequenze géing spieren, wier ebe beim Gas. Och wa Lëtzebuerg direkt dovunner manner impaktéiert wier.

Wann ee vun haut op muer de Gas aus Russland géing op Null setzen, misst ee sech bewosst sinn, dass een déi nächst Wanteren eng Rei Industriebetriber misst zoumaachen, fir och genuch Gas fir d'Privatleit ze hunn. Dat wier virun allem fir Däitschland e gréissere Problem, esou de Claude Turmes.

Hie wier, wat dat ugeet, am Gespréich mat sengem däitschen Homolog, dem Robert Habeck. Ma hei wier et wichteg, eng europäesch Léisung ze sichen.

Eng Virreiderroll, wéi et zum Beispill Litauen schonn ugekënnegt huet, wéilt Lëtzebuerg net anhuelen. De Krich géing Europa scho genuch splécken, esou de Claude Turmes. Do wier et dat falscht Signal, wa lo all Land mécht wat et wëll.

Allgemeng wier et awer fir d'Klimapolitik wichteg, méi op erneierbar Energien ze setzen.
Een Challenge si jo awer bekanntlech d'Laangzäitspäicher. Wéi wëll een do virgoen?

Dee grénge Waasserstoff kann een an ënnerierdesche Caverne lageren, an dann notzen, wann ee manner Solar- oder Wandenergie huet, war doropshin dem Claude Turmes seng Äntwert. Ausserdeem wier d'Stroumnetz selwer e Späicher, dat geet duerch ganz Europa, vu Portugal bis an d'baltesch Länner.

D'Schwieregkeet wier dem Claude Turmes no, éischter mat der Solar- a Wandenergie weiderzekommen wéi, dass net genuch Späicherkapazitéiten do wieren. Grondsätzlech Energie aspueren wier och effikass, mee och do huet sech den zoustännege Minister fir eng europäesch Campagne ausgeschwat:

Aus Solidaritéit mat der Ukrain, mee och fir de Klimaschutz sollt ee versichen, Energie ze spueren. Mee fir wierklech weiderzekommen, wieren europäesch Decisiounen néideg.

Beispiller kéinte sinn, dass a ganz Europa op den Autobunne méi lues gefuer gëtt oder d'Flicht, fir zwee Deeg an der Woch vun doheem ze schaffen, fir d'Transportemissiounen ze spueren.

Invité vun der Redaktioun: Claude Turmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.