E Méindeg de Moie war déi nei LSAP-Co-Presidentin eis Invitée vun der Redaktioun.

Den Tripartite-Accord ass anstänneg a verstänneg, mä och temporär, huet d’LSAP Presidentin Francine Closener e Méindeg de Moien hei op RTL ënnerstrach. Déi niddreg Gehälter hätte mam Index manner krut ewéi elo mat de Steierkreditter, déi fir Gehälter vu bis zu 100.000 Euro Brutto d’Joer virgesi sinn. D’Francine Closener huet zouginn, den Ënnerscheed wier net enorm, mä et wier drëm gaangen, déi "schmuel Schëlleren" z’ënnerstëtzen. Si sot och dowéinst deene Leit an den ieweschte Gehälterkategorien "Merci".

Déi grouss Froen, och d’Steierfroen, géingen nach kommen, sou d’Francine Closener weider. Datt d’Steierreform krisebedéngt net hätt kënne gemaach ginn, huet si bedauert.

D'Gespréich mat der OGBL-Presidentin Nora Back, déi den Tripartite-Accord jo verworf huet, wéilt si fir d'éischt elo mol net an der Ëffentlechkeet féieren. Si hätt och schonn eng Gespréichsoffer gemaach. Et wier keng einfach Zäit gewiescht fir den OGBL an och net fir d'LSAP, sou d’Francine Closener. Béid hätten eng gemeinsam Geschicht, mä als politesch Partei hätt d’LSAP en "anere Spektrum ofzedecken" an en aneren Equiliber ze sichen ewéi d’Gewerkschaft.

D'LSAP misst awer en Equiliber siche fir d'ganzt Land. Dat Ganzt wier keng Fro vu Klassekampf. Den eigentleche Feind wier de Wladimir Putin.

Invité vun der Redaktioun: Francine Closener

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.