En Dënschdeg de Moie war déi nei Presidentin vun der Enseignantsgewerkschaft SEW vum OGBL eis Invitée vun der Redaktioun.

Eise Schoulsystem ass effektiv gutt opgestallt, an eis Enseignanten hunn déi néideg Experienz. Allerdéngs mécht déi grouss Zuel vun de Kanner eis Suergen. 1.200 kéimen der bei all déi aner dobäi. Wann ee vu Klasse vun 20 ausgeet, wären dat 60 Klasse méi.

Do brauch een och déi néideg Infrastrukturen an eben och d’Personal, an do gëtt et jo scho laang Jore Lacunnen. An de Maisons Relaise wär dat och de Fall. Dat sot d’Joëlle Damé en Dënschdeg de Moien als eis Invitée vu der Redaktioun.

Déi nei Presidentin vum SEW, dem Erzéiungssyndikat vum OGBL fënnt, dass et e ganz grousse Kraaftakt wäert ginn, fir dat alles hinzekréien.

Et wier vill geleescht gi vun den Enseignanten, och schonn duerch d’Pandemie. Et géif een et awer hikréien, wann een net mat ze vill anere Saache geplot wär, wéi der Basis-Aarbecht, nämlech dem Schoulhalen. Den SEW fuerdert dofir en éierlechen Dialog mam Ministère, an dass een net ze vill mat administrativen Chargen belaascht gëtt.

Et wier fir d’Joëlle Damé och kloer, dass och e psychologesche Service fir méiglech traumatiséiert Kanner géif gebraucht ginn.

Schued fënnt d’SEW-Presidentin et och, dass d’Gewerkschaften net mat agebonne ware beim Ausschaffe vum Plang vum Acceuil vun de Flüchtlingskanner.

Invité vun der Redaktioun: Joëlle Damé

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.