E Mëttwoch de Moie war déi nei Presidentin vum Kierchefong eis Invitée vun der Redaktioun.

6 Joer no der Trennung vu Kierch a Staat schreift de Kierchefong nach keng schwaarz Zuelen. Dat sot déi nei Presidentin Marianne Bausch, e Mëttwoch de Moien als eis Invitée vun der Redaktioun. Och dass d'Kierchen hu misse Corona-bedéngt zou bleiwen, hätt e finanziellen Impakt gehat. Notamment well esou d'Kollekten an der Kierch ëm 30 Prozent erofgaange wieren. Nieft den Donen an de Loyere sinn d‘Kollekten een Haaptrevenu vum Kierchefong. 2022 wier dann och nach e schwéiert Joer, wéinst den héijen Energiepräisser, déi d‘Hëtze méi deier maachen. D‘Hëtze vun de Kierchen wier net evident an géing ronn 20 Prozent vun de Käschte vum Kierchefong ausmaachen.

Fir sech an Zukunft ze finanzéieren a finanziell iwwer Waasser ze halen, setzt de Fong ënnert anerem op Immobilien. Et géing een op den eegenen Terraine bauen an da verlounen. Ugangs war geplangt sozial Wunnengen ze bauen, ma déi Iddi hätt ee fale gelooss, well sech d‘Konditiounen, fir déi ze bauen, geännert hätten an net méi avantagéis wieren. Och wa sozial Wunnenge besser mat de chrëschtleche Valeure géingen iwwerenee stëmmen, sou misst een awer schwaarz Zuele schreiwen a léieren onofhängeg ze ginn. Ongeféier misst een do all Joer e Budget fir 8 Milliounen Euro zesummekréien an aktuell wier dat mat Sozialwunnengen net méiglech. D‘Invitée schléisst awer net aus, dass sech dat an Zukunft nees kéint änneren.

Allgemeng war d‘Trennung vu Kierch a Staat eng Ëmstellung fir d‘Personal a fir déi ronn 1.000 Benevollen. Ma zanter der Grënnung vum Kierchefong wier awer och eng besser Gouvernance en place an d‘Prozedure wiere méi transparent an effikass. Zum Beispill hätt ee virdrun e puer honnert Assurancen-Kontrakter fir all déi eenzel Kierchen gehat. Mëttlerweil wier et just nach een eenzege Kontrakt, erkläert d‘Marianne Bausch. Et gi 493 Kierchen a Kapellen am Land. De Gemengen gehéieren 356 Gebaier an vun deenen huet sinn der 70 Prozent elo mam Kierchefong konventionéiert. Virun annerhallwem Joer waren et nach 50 Prozent. Dat géing och nach an d‘Luucht goen. De Fong selwer ass iwwerdeems Proprietär vun 137 Kierchen a Kapellen. Bis ewell goufen zanter der Trennung iwwerdeems 4 Kierchen an 11 Kapellen desakraliséiert.

D'Relatioun mam Staat huet d'Presidentin vum Kierchefong als entspaant bezeechnen.

Invité vun der Redaktioun: Marianne Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.