En Donneschdeg de Moie war de Spriecher vun déi Lénk eisen Invité vun der Redaktioun.

Et gëtt vill Wunnraum deen disponibel ass, mä mir sinn an der kranker Situatioun, wou dee Wunnraum als Spekulatioun gesi gëtt, fir Profit ze maachen an dofir bleift deen dann eidel. Dat sot de Gary Diderich, Spriecher vun Déi Lénk, en Donneschdeg de Moien als eisen Invité vun der Redaktioun.

Et géif nach ëmmer kee Regëster gi vu Wunnengen, déi am Land eidel stinn, wéinst administrative Problemer. Dobäi kéint een einfach vu vireran all Wunnraum besteieren a just wann ee beweisen kann, dass een do wunnt, wat jo net schwéier wier, wier et steierfräi, proposéiert den Invité. Aktuell misst ee sech nämlech a punkto eidel stoend Wunnengen op Schätzunge baséieren.

Déi Lénk proposéieren 7, wéi si et nennen, "urgent Mesuren", fir méi Wunnraum ze schafen. D’Grondrecht op eng Wunneng misst dofir mol virop geschaaft ginn. Aktuell wier an der Verfassung nämlech just d‘Recht op Eegentum verankert. D’Taxéiere vum eidel-stoende Wunnraum wier zwar theoretesch méiglech, mä géif a ville Gemengen net ëmgesat ginn, well et géing u Courage feelen. D‘Argument wier, dass et rechtlech Onsécherheete géifen, an dofir wier et wichteg d'Recht op e Logement an der Verfassung als Grondrecht ze verankeren.

Eng aner Mesure, déi di Lénk proposéieren, ass fir eidel Büros- a Commerce-Raim ze reaffektéiere fir de Logement. Besonnesch duerch d‘Pandemie an den Homeoffice wär de Besoin u Büros- an Verkafsflächen nämlech zeréckgaangen. Dat kéint och relativ séier ëmgesat ginn, erkläert de Spriecher vun déi Lénk.

D’Urgence vun der Logementskris muss awer fir d'éischt mol unerkannt ginn. D'Bewosstsinn dofir géing aktuell feelen, esou den Gary Diderich. Eréischt da wier et méiglech, fir séier Mesuren ze huelen. Dat hätt een an der Corona-Pandemie an och elo wärend dem Ukrain-Krich gesinn.

De Bauperimeter erweideren, ass fir Déi Lénk iwwerdeems keng Musse-Saach. De Bestoende géif duergoen. Ma et misst een kreativ ginn, zum Beispill, wann eréischt a 5 Joer ugefaange gëtt mat bauen, kéint een elo schonn mat moduläre Strukture Wunnraum schafen oder méi an d'Luucht bauen, sou den Invité.

Invité vun der Redaktioun: Gary Diderich

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.