E Freideg de Moie war den CSV-Deputé-Maire eisen Invité vun der Redaktioun.

Et ass e Sak voller Detailer an éierlech gesot „schwere Kost“. Dat sot e Freideg de Moien de Vizepresident vun der neier Spezialkommissioun Tripartite, de Gilles Roth als eisen Invité vun der Redaktioun. Fir de Co-Fraktiounspresident vun der CSV ginn et nach ganz vill oppe Froen zum Tripartite-Accord an dat obwuel en Donneschdeg souwuel de Statec wéi och d‘Steierverwaltung den Deputéierte weider Informatiounen an Erklärungen ginn haten. D’CSV wëll awer net nëmmen déi staatlech Verwaltungen héieren, ma och déi eenzel Verhandlungspartner, also d’Patronat an d’Gewerkschaften. Deemno och den OGBL, déi den Accord jo net matdréit. Et géif net ëm näischt goen, mä ëm e Pak vun 830 Milliounen Euro.

Op déi Demande vun der CSV gouf et um Freideg de Mueren dann och schonn direkt e klore „Nee“ vum President vun der Kommissioun, dem liberalen Deputéierten Gilles Baum. Et géing ee sech mat engem ausgehandelten Accord a senger Ëmsetzung beschäftegen a keng No-Verhandlungen maachen. Par konter wier et awer eng gutt Iddi, déi verschidde Beruffschamberen, d‘Chambre des Salariés, d‘Chambre des Fonctionnaires etc. ze gesinn.

Index a Steiere mussen harmonéieren

Den Index gehéiert zum Lëtzebuerger Sozialdialog an d'CSV steet zum Sozialdialog. Dat sot de Gilles Roth zur Fro, ob den Index iwwerhaapt nach zäitgeméiss wier. Mä den Index géing versichen e Kafkraaftverloscht auszegläichen. Ma déi sozial Gerechtegkeet, déi ee misst doriwwer aféieren, géing duerch d‘Steiere gemaach ginn an dofir bräicht et eng Harmonie tëscht dem Index an de Steieren. Do hätt d'Regierung et verpasst, fir d'Steiertabellen un d'Inflatioun unzepassen, esou de Gilles Roth. Dat hätt misse gemaach ginn, wéi et dem Staat gutt goung.

Kapital muss méi besteiert ginn

Et géing eng grouss Diskrepanz tëscht de Steieren op Paien, also op d'Aarbecht, an de Steieren op d'Kapital, an do wier d'CSV och net ganz onschëlleg, gëtt de Gilles Roth zou. Et wier net normal, dass wann een 100.000 bis 200.000 Euro Plus-Value op de Verkaf vun engem Appartement mécht, just 20 Prozent Steiere bezuele misst, amplaz vu 40 Prozent. Et kann ee scho vun dëser reduzéierter Plus-Value-Steier profitéieren, wann een d'Appartement just 2 Joer am eegenen Besetz hat. D'CSV fuerdert do zum Beispill e Minimum vu 5 Joer.

Invité vun der Redaktioun: Gilles Roth

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.