E Méindeg de Moie waren d'Journaliste Pierre Jans a Jeannot Ries eis Invitéë vun der Redaktioun.

Dat méi knappt Resultat mécht et fir den Emmanuel Macron méi schwéier, sech och bei de Legislativen am Juni duerchzesetzen. Viru 5 Joer ass den Duell Macron vs. Le Pen nämlech mat engem Ënnerscheed vu gutt 30 Prozentpunkten entscheet ginn, dës Kéier sinn et der 17. D'Abstentioun vun 28 Prozent weist och däitlech, dass eng gewëssen Onsécherheet an Enttäuschung do ass. Normalerweis läit deen Taux nämlech bei ronn 20 Prozent. Elo gëllt et, d'Vertraue vun de Leit nees zeréckzegewannen, esou d'Aschätzung vun eise Journaliste Pierre Jans a Jeannot Ries, déi fir eis d'Walen a Frankräich vu Paräis aus suivéiert hunn. Si waren e Méindeg de Moien eis Invitéë vun der Redaktioun.

An den zwee Departementer, Meurthe et Moselle a Moselle, déi eng Grenz mat Lëtzebuerg hunn, ass d'Resultat souguer nach méi knapp ausgefall. 50,46 Prozent hunn an der Moselle fir de Président sortant Emmanuel Macron gewielt. Am Departement Meurthe et Moselle ass d'Resultat bësse méi däitlech mat eppes iwwer 54 Prozent fir den Emmanuel Macron a knapp iwwer 45,5 Prozent fir d'Marine Le Pen. D'Meuse (55,60 Prozent) an d'Vogesen (52,40 Prozent) par conter sinn un d'Marine Le Pen gaangen. Am Ganze si 27 Departementer un d'Marine Le Pen gaangen, dorënner och d'Départements d'Outre-mer. An 73 Departementer läit den Emmanuel Macron vir.

Elo geet d'Aarbecht réischt richteg lass, esou de gewielte President e Sonndeg. D'Presidentielle wieren nëmmen deen éischte Schrëtt gewiescht, elo wier de Startschoss fir d'Walcampagne fir d'Legislativen, déi a knapp 7 Woche sinn, den 12. Juni. Zweeten Tour dovunner ass den 19. Juni. Da gëtt dat neit Parlament gewielt, also 577 Deputéierter.

Invité vun der Redaktioun: Pierre Jans a Jeannot Ries

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.