En Dënschdeg de Moie war d'Inneministesch Taina Bofferding eis Invitée vun der Redaktioun.

"De gudde Wëlle geet net duer, mee et musse Reegelen an Obligatioune ginn, fir de Logementsproblem an de Grëff ze kréien." Dat sot Dënschdeg de Moien d'Inneministesch Taina Bofferding. Si war eis Invitée vun der Redaktioun.

Dofir ginn et fënnef "Puzzelstécker", esou d'Ministesch: Den Artikel 29bis vum Pacte Logement 2.0 gesäit vir, datt méi abordabele Wunnraum muss gebaut ginn an datt déi Objeten och an ëffentlecher Hand bleiwen.

Mam Baulandvertrag soll verhënnert ginn, dass Terraine brooch leien, obwuel kéint drop gebaut ginn.

Duerch de "Remembrement ministériel" sollen eenzel Proprietären e grousse Bauprojet net méi kënne verhënneren. Hiren Terrain géing da souzesoe verréckelt ginn, wou en de Projet net méi stéiert.

Mat der Reform vun der Grondsteier wëll d'Ministesch da géint d'Spekulatioun virgoen an als leschte Punkt nach d'Prozedure vereinfachen an d'Delaie kierzen. Wéini et genee zur Grondsteierreform kënnt, war par contre nach net gewuer ze ginn.

De Baulandvertrag ass och an der Maach, den Ament wier de Gesetzesprojet um Instanzewee. Wéinst enger Opposition formelle vum Staatsrot missten elo awer nach Adaptatioune virgeholl ginn. Dat Gesetz soll verhënneren, dass Bauterraine brooch leien, obwuel kéint drop gebaut ginn. Wa bannent véier Joer keng Infrastruktur ugeluecht gëtt, sinn am Gesetzesprojet Sanktioune virgesinn. Déi genee Krittäre missten den Ament iwwerschafft ginn, wat juristesch net einfach wier. D'Inneministesch Taina Bofferding hätt awer net wëlles, de Projet zeréck ze zéien, sot si am RTL-Interview.

"Fir mech ass et dat Wichtegst, dass d'Leit sech d'Wunnen am Land nees kënne leeschten. Et ass net normal, dass e Groussdeel vun der Pai an de Logement, also an de Prêt muss fléissen. Mer brauche grondleeënd Verännerungen", esou d'Taina Bofferding en Dënschdeg.

Den Artikel 29bis vum Pacte Logement 2.0 gëtt schonn zanter knapp zwee Méint applizéiert a gesäit vir, dass méi abordabele Wunnraum muss gebaut ginn, wann nei Wunnquartieren entstinn. Konkret ass dat bei Projete mat fënnef bis néng Wunnengen en Undeel vun op d'mannst 10 Prozent. Bei 10 bis 25 Wunnenge sinn et op d'mannst 15 Prozent a bei iwwer 25 Unitéite mussen op d'mannst 20 Prozent abordabel sinn.

Doriwwer eraus mussen déi Objeten och an ëffentlecher Hand bleiwen. Wëllen d'Gemenge se net iwwerhuelen, spréngt de Staat an. Méiglech ass eng abordabel Locatioun, déi u Krittäre wéi dem Revenu gebonnen ass. Mee awer och de méi gënschtege Verkaf vu Logementer, ouni den Terrain. D'Gemeng oder de Staat behält dann och d'Réckkafsrecht, esou dass de Bien weider an ëffentlecher Hand bleift an erëm als abordabele Logement un aner Leit ka verkaaft ginn.

Et dierft net méi virkommen, dass Leit mat abordabelem Wunnraum Sue maachen, esou nach d'Taina Bofferding.

Invitée Redaktioun: Taina Bofferding

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.