En Donneschdeg de Moie war de President vum Sigi eisen Invité vun der Redaktioun.

1982 gouf de Sigi, de Gemengesyndikat, fir déi informatesch Gestioun gegrënnt an zanterhier huet sech vill gedoen. Viru 40 Joer waren 3 Gemengen dran, Wolz, Réimech an Esch-Uelzecht an et gouf kaum e Computer an enger Gemeng oder Verwaltung. Haut sinn et 101 Gemengen an d'Informatik ass net méi ewechzedenken. Dat sot de President vum Sigi an Iechternacher Buergermeeschter Yves Wengler en Donneschdeg de Moien als eisen Invité vun der Redaktioun. Haut géing een net méi vun Digitalisatioun en tant que tel schwätzen, ma virun allem vun Transformatioun, also fir Prozesser nei ze designen. Haapt-Defi wier et fir an Zukunft ganz ouni Pabeier ze schaffen. Besonnesch duerch déi lescht 2 Joer Corona-Pandemie hätte vill Gemengen zwar e grousse Sprong a punkto Digitalisatioun gemaach duerch Videokonferenzen an Télétravail, ma et géifen trotzdeem nach ëmmer ze vill Demarchë ginn, déi ee just um Pabeier kéint maachen, kritiséiert den Yves Wengler.

Zum Beispill géing Enovos Rechnungen un d'Gemengen zwar digital schécken, mee et wär een da forcéiert, se ze printen, fir se z'ënnerschreiwen, ee Mandat de paiement ze maachen a se dann ze stockéieren. Dat wier eng enorm Ressourcë-Verschwendung an dofir bräicht et just eng kleng legislativ Ännerung, fir Pabeier ze spueren, esou den Invité. Änlech wier et, wann e Kand gebuer gëtt. Da muss de Papp nach ëmmer mam Certificat de naissance op d'Gemeng trëppelen. Do géifen dann d'Donnéeën, déi souwisou schonn an engem informatesche System sinn, nach eemol nei encodéiert gi mat enger weiderer Feelerquell. Een Transfert vun den Donnéeë wier ouni weider Problemer méiglech, och do wier et just eng kleng legislativ Ännerung, erkläert de President vum Sigi.

Den Yves Wengler proposéiert dofir een "Pacte Digitalisatioun" änlech wéi den "Pacte Clima" fir d'Gemengen. Déi digital Transformatioun bräicht nämlech vill Personal an d'Gemengen eleng kéinten déi Käschten net stemmen. Mat engem Pakt kéint een déi néideg finanziell Ureizer schafen, fir d'Digitalisatioun virun ze dreiwen. Do léich de Ball bei der Regierung, esou den Invité. Den Yves Wengler huet dann och drop opmierksam gemaach, dass et wichteg, besonnesch aktuell am internationale Kontext, fir op Lëtzebuerger Léisungen ze setzen, fir Daten ze stockéieren. Déi grouss Provider aus den USA kéinten nämlech duerch de Patriot Act och sensibel Donnéeë kucke goen. Et dierft ee sech do net esou ofhängeg vum Ausland maachen, esou nach den Invité.

Invité vun der Redaktioun: Yves Wengler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.