E Freideg de Moie war de President vun der Gewerkschaft vun de Chargéen (ACEN) eisen Invité vun der Redaktioun.

D'Aarbecht vu Chargé a Proff ass genee déi selwecht. Den Ënnerscheed gëtt et nëmmen am Statut. Déi eng sinn Employé, déi aner Fonctionnaire beim Staat an déi Differenz stelle mer och net a Fro. Mä mir kritiséieren, dass d'Aarbechtskonditioune fir Chargéë méi schlecht sinn. Dat sot de Luc Wildanger, President vun der ACEN, der Chargés-Gewerkschaft. Hien war e Freideg de Moien eisen Invité vun der Redaktioun.

Et gëtt een Ënnerscheed an der Paie an dee wär och legitim, mä de gréissten Ënnerscheed wär an den Aarbechtsbedéngungen an an der Aarbechtstâche. D'Chargéë missten zum Beispill méi Stonne schaffen, déi par Rapport zu de Fonctionnaire bal een Drëttel méi wär. „Stellt iech vir aner Employéë beim Staat misste 55 Stonnen op de Büro sëtze goen, wou de Fonctionnaire bis 40 Stonnen do sëtze muss, fir d‘Basis-Tâche. Do géif een „Opschrei“ duerch d‘Ministèrë goen,“ esou de Luc Wildanger. Den Ënnerscheed bei den Tâchë wëll d'Gewerkschaft net méi acceptéieren. An de Lycéeë gëtt aktuell bal en Drëttel vun alle Stonne vu Chargéë gehalen. An der Erwuessenebildung gi bal 60 Prozent vun de Stonne vu Chargéë gehalen, am Institut national des langues iwwer 80 Prozent an am Museksunterrecht iwwer 90 Prozent.

Och d'Fonctionariséieren, also datt en Employée no 15 Joer beim Staat kann iwwert en Exame Fonctionnaire ginn, géif absolut net klappen. „Et ass een Debakel“, sou de President vun der ACEN. Vill Demandë géifen ouni Äntwert vum Educatiounsministère bleiwen an d‘Konditioune fir Fonctionnaire ze ginn, wieren esou schlecht, dass vill Leit dat guer net wéilte maachen. D'Zuele géifen do fir sech schwätzen: zanter 2015 wiere just 13 Leit "fonctionariséiert" ginn. Vu ville Säiten, aus alle politesche Parteien, géifen d'Chargéen zwar Recht kréien, an awer wier nach näischt geschitt, fir d'Situatioun ze verbesseren. Et wéilt een awer weider op den Dialog mam Educatiounsminister setzen. Léiwer argumentéiere wéi streiden, esou nach den Luc Wildanger vun der Chargés-Gewerkschaft ACEN.

Invité vun der Redaktioun: Luc Wildanger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.