En Dënschdeg de Moie war den Direkter vun der Fedil eisen Invité vun der Redaktioun.

E Pëtrolsembargo géif sécher méi héich Präisser bedeiten an och definitiv e Potential fir weider Inflatioun. Dat misst ee fäerten, och wa mer manner vum Pëtrol ofhängeg wiere wéi vum russesche Gas. Dat sot de Direkter vun der Industriellefederatioun, FEDIL. De René Winkin war en Dënschdeg de Moien eisen Invité vun der Redaktioun.

E Gas-Embargo wier méi schwéier ze packen, well ee beim Gas méi schwéier een Ersatz géing fanne wéi beim Pëtrol. Speziell Länner wéi Däitschland an Éisträich si staark ofhängeg, well si de Gas an der Haaptsaach iwwer Pipeline kréien an et do wier et net esou einfach op de maritimme Wee, also op Schëffer, ze wiesselen.

Et wier héich Zäit, dass ee dovu géing schwätzen, wéi a wou ee Gas spuere kann, sou den Direkter vun der Fedil zur Propose vum Energieminister Claude Turmes, fir europawäit Aspuerungen ze maachen, fir de Präis ze stabiliséieren. Och wa kee Gas-Embargo kënnt, géif nämlech de Risk bestoen, datt Moskau de Gas-Krunn zoudréint. Dowéinst muss ee kucke souwäit et geet aus der Ofhängegkeet vu russeschem Gas erauszekommen. Europa kritt aktuell 40 Prozent vun sengem Gas aus Russland. Et wier een derbäi no Alternativen ze sichen, ma et géing een ni alles ofgedeckt kréien. Deemno géing et ëmmer een Deel ginn, wou een net wéisst, wou dee soll hierkommen. Dofir misst ee versichen, den Deel iwwer Aspuerungen ze gewannen. Do géif et zum Beispill Potential beim Hëtzen a bei der Industrie ginn.

A wann da Gas an de kale Wanterméint géing feelen, misst natierlech bei der Industrie fir d'éischt agespuert ginn, sou de René Winkin.
D‘Sich no Alternative wier och am Sënn vun der Energie-Transitioun, well dacks géing ee vum Gas ëmklammen op Stroum-gedriwwe Léisungen an deemno och op alternative Stroum. Dat wär am Sënn vun enger Dekarboniséierung, esou den Direkter vun der Fedil.

Invité vun der Redaktioun: René Winkin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.