En Donneschdeg de Moie war déi nei Ëmweltministesch eis Invitée vun der Redaktioun.

Datt d'Justizministesch Sam Tanson d'Ex-Ëmweltministesch Carole Dieschbourg iwwert den Ofschloss vun der Vir-Enquête iwwert d'Gaardenhaischen-Affär informéiert huet, dat wollt déi nei Ëmweltministesch Joëlle Welfring en Donneschdeg de Moien hei op RTL net kommentéieren. Dat wier nämlech eng Affär, déi nach leeft an als Member vun der Exekutive wier et net hir Roll, sech domadder ze befaassen. "Als Bierger an als Mënsch fannen ech d'Affär Dieschbourg ganz bedauerlech", sot déi nei Ëmweltministesch nach. Am Interview mam Joëlle Welfring ass et awer haaptsächlech ëm d’Ëmweltpolitik gaangen.

Bis déi nächst Chamberwale sinn et nach bësse méi ewéi 16 Méint, mee et leien nach zwou Summerpausen dotëscht. Wéineg Zäit also, fir déi vill Aarbecht, déi nach usteet, esou d'Joëlle Welfring. Si huet als Beispiller d'Bëschgesetz genannt an de ganze Pak Gesetzer iwwert d'Gestioun vum Offall. Deen ass zwar scho vun der Chamber guttgeheescht ginn, mee déi nächst Woch géing een nach méi dovunner héieren, wa mat de betraffen Acteuren de Pak a Musek ëmgesat gëtt.

Bei der Ëmsetzung vum neie Klimabonus, der staatlecher finanzieller Hëllef fir d'Sanéiere vu Wunnengen, do stelle sech iwweregens och nach ëmmer vill Froen. Ma dat wier keen neie Phenomen, sou déi nei Ëmweltministesch. Dofir wier d'Klimagence awer och nei opgestallt ginn, a mat de Beroder wier een elo gutt "gewappnet" fir den Ongewëssheeten entgéintzewierken.

Op d'Kritik ugeschwat, datt d'Ëmweltverwaltunge Projeten ausbremsen oder blockéiere géingen, sot d'Joëlle Welfring si geséich guer net de Sënn, firwat ee misst eppes blockéieren. Par contre hätten all d'Ëmweltschutzgesetzer eben hiren Zweck an zwar d'Ressourcen ze sécheren an d'Natur ze schützen. Si géing den Accent dropsetzen, datt bei grousse Projeten awer déi, déi d'Projeten droen, sou fréi ewéi méiglech iwwert d'Verflichtungen informéiert ginn, déi et nun emol gëtt.

Vill Aarbecht also bis zu den nächste Walen. D'Joëlle Welfring huet an hirer ganz kuerzer Zäit am Ëmweltministere schonn nei Leit agestallt. Waren d'Beamten, déi schonn do sinn, net gutt genuch? Nee absolut net, huet d'Joëlle Welfring geäntwert. Mee wann een op ee lafenden Zuch misst sprangen, da wier et och an hiren Aen gutt, wann ee Leit dobäi hätt mat deenen ee gewinnt ass zesummen ze schaffen an et wier och wichteg d'Ekipp ze verstäerken.

Bei den nächste Chamberswale wäert d'Joëlle Welfring sech fir déi Gréng am Süden opstellen.

Invité vun der Redaktioun: Joëlle Welfring

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.