En Dënschdeg de Moie war d'Direktesch vum SCAS eis Invitée vun der Redaktioun.

De Schutz vu Kanner a Jugendlechen, virun enger Gefor an den eegene Wänn oder viru sech selwer... dat ass ëmmer eng ganz sensibel Affär. Aktuell gëtt u Reforme geschafft, fir Jugendschutz a Jugendstrofrecht vuneneen ze trennen an do ginn d’Meenungen auserneen. Déi eng fannen, dat wier gutt, well ee misst méi preventiv schaffen. Déi aner, déi sinn der Meenung, datt ee béides net gutt vunenee kann trennen. Falls béid getrennt ginn, da wäert de Service central d’assistance sociale, de SCAS, sech just nach ëm Jugendlecher iwwer 14 Joer këmmeren, déi eppes verbrach hunn. Well de SCAS wier da just nach fir Jugendstrofrecht responsabel, sou d’Direktesch vum SCAS d’Marie-Claude Boulanger en Dënschdeg de Moien hei op RTL.

A si ass awer der Meenung, datt och Jonker ënner 14 Joer sollen ënnert d’Jugendstrofrecht falen. De SCAS hätt aktuell vill Fäll vu Kanner vun 13 Joer, déi zum Beispill eppes geklaut hätten. Bei esou mi harmlose Verbrieche géing de SCAS d’Kanner encadréieren a bäibréngen, datt een net däerf klauen. Fir z’illustréieren, datt leider och bei Kanner heiansdo eng repressiv Mesure néideg kéint sinn, huet d’Marie-Claude Boulanger e mi extreemt Beispill geholl: Een deen een Dag manner ewéi 14 Joer al wier a seng Frëndin géing ëmbréngen, géing net ënnert d’Strofrecht falen.

D’Marie-Claude Boulanger huet betount: Mesuren, déi déif an d’Familljeliewen aschneiden, ewéi e Placement zum Beispill, dat wier natierlech haut schonn ëmmer déi lescht Optioun. «Wat eis ganz um Häerz läit, datt ass e Placement op jidder Fall z’evitéieren», sou d’Marie-Claude Boulanger.

De SCAS an d’Justiz géingen ëmmer no aner Léisunge sichen. Wann d’Sozialaarbechter "an eng Famill" géinge goen, da géing ee mam Kand op där Sprooch schwätzen, där d’Kand gewuess wier. Donieft natierlech och mat den Elteren, mam Entourage wéi zum Beispill d’Schoulpersonal. Opgrond vun engem «objektive» Rapport mat och Léisungsvirschléi vum SCAS, géing dann e Riichter eng Decisioun huelen. Dozou gehéiere virun allem sozio-edukativ Mesuren, wou d’Kanner Stonnen operluecht kréien, déi se an eng Institutioun musse goen, déi sech ëm mam jeeweilege Problem befaasst.

D’Aarbechten un de Gesetzprojeten fir e Jugendstrofrecht ze schafen a vum Jugendschutz ze trennen sinn nach am gaangen. D’Direktesch vum Service central d’assistance sociale, d’Marie-Claude Boulanger sot de Justizministère hätt de SCAS bei den Aarbechten um Volet Jugendstrofrecht vill matagebonnen. Wat de Jugendschutz ugeet, hätt den Educatiounsministère de SCAS zwar héieren, mä den Text wier eleng vun hinne geschriwwe ginn.

Invité vun der Redaktioun: Marie-Claude Boulanger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.