En Donneschdeg de Moie war d'Direktesch vun der ADEM eis Invitée vun der Redaktioun.

Et ass schwéier soen, ob d’Konsequenze vun der Pandemie op eisen Aarbechtsmarché iwwerstane sinn. De Chômage-Taux ass zwar sou déif wéi zanter 2009 net méi, mä d’Pandemie wier net eriwwer an et wier net virauszegesinn, wéi eng Effekter en Nees-Opflame vun den Infektioune kéint hunn. Dat sot d’Isabelle Schlesser en Donneschdeg de Moien als eis Invitée vun der Redaktioun. D’Beruffer géinge sech och ëmmer méi séier änneren an dofir wier d’Weiderbildung immens wichteg, esou d'Direktesch vun der ADEM. Am meeschte gesicht gi weiderhin Informatiker, Comptabelen oder Personal fir den Horeca-Beräich.

Eng 7.000 Leit si fir den Ament iwwer 1 Joer bei der ADEM ageschriwwen, se gëllen deemno als Laangzäitchômeuren. Dat wier e Chiffer, deen zwar och erofgaangen ass, mä manner séier. Dovunner hate 5.000 iwwerhaapt keng Aktivitéit wärend dem leschte Joer. 60% vun de Betraffenen hätten iwwer 45 Joer, se sinn am Schnëtt manner qualifizéiert an een Drëttel hätt och medezinesch Problemer.

Ukrainesch Flüchtlingen: 80 Prozent mat Uni-Diplom

Ukrainesch Flüchtlingen hu jo direkt de Statut, fir dierfe schaffen ze goen. Iwwer 300 vun hinnen hätte sech bis ewell bei der ADEM ageschriwwen, sou d’Isabelle Schlesser. Et hätt ganz lues ugefaangen, d’Demande géif awer elo no an no an d’Luucht goen. 70% vun den ukraineschen Demandeure wäre Fraen an déi meescht wären héich qualifizéiert. 80% hunn en Unisdiplom. De groussen Defi fir déi ukrainesch Flüchtlinge wieren natierlech d‘Sproochen. Mam Englesche kéint een an enger Rei Secteure gutt schaffen, an anere wier et natierlech méi schwéier.

Eng ëmstridden Job-Offer

D'Direktesch vun der ADEM huet dann och nach eemol Erklärunge ginn, wéi et konnt dozou kommen, dass eng Danz-Pedagogin eng Offer gemaach krut, fir Striptease-Dänzerin an Escort-Girl ze ginn. All Job misst bei der ADEM gemellt ginn an da géing och no entspriechende Kandidate gesicht ginn. Bei sou delikate Poste géing awer keng Convocatioun per Bréif geschéckt ginn, mä et géing een d'Leit da perséinlech uruffen. Donieft géif et dann och keng Obligatioun ginn, fir dësen Job unzehuelen. Béides wier an dësem Fall net geschitt, erkläert d‘Direktesch vun der ADEM. Et wier e Feeler, deen net hätt dierfe geschéien an et hätt ee sech natierlech och direkt bei den zwou Fraen entschëllegt, esou d'Isabelle Schlesser.

Invité vun der Redaktioun: Isabelle Schlesser

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.