E Mëttwoch de Moie war de laangjäregen CSV-Deputéierten eisen Invité vun der Redaktioun.

Et hätt een et kënnen anescht maachen. Eng Resolutioun wier vläicht besser wéi e Gesetz. Et hätt een och méi wéi een Expert kënnen héieren. Esou kommentéiert de Paul-Henri Meyers d'Manéier, wéi d'Chamber mam Dossier Dieschbourg ëmgeet. De fréieren CSV-Deputéierten a Verfassungsexpert war e Mëttwoch de Moien eisen Invité vun der Redaktioun.

Datt d'Chamber zéckt, kéint hie verstoen. Wann awer elo e Gesetz gemaach gëtt, do gesäit de fréiere Politiker eng Rei Geforen. Ënner anerem géif e Gesetz gemaach gi fir eng Persoun an do besteet de Risk, datt een dat Gesetz enger Situatioun upasst. E weidere Problem ass deen, datt d'Gesetz sech op Faite bezitt, déi an der Vergaangenheet leien.

Wann d'Chamber d'Madamm Dieschbourg selwer héiert, ass do net de Prinzip vun der Séparation des pouvoirs violéiert? Dat ass eng weider Fro, déi de Verfassungsexpert sech stellt.

D'Léisung kéint fir hien am Artikel 119. am zweete Saz stoen. Wann d'Chamber der Meenung ass, datt den Dossier net genuch hiergëtt fir eng weider Instruktioun, dann ass d'Affär eriwwer. Wann awer belaaschtend Elementer do sinn, da kéint d'Chamber eng Resolutioun huelen, mat där de Parquet gefrot, gëtt den Dossier weider z'analyséieren.

Hie géing net der Vergaangenheet notraueren. Mä dës Situatioun géing op en Neits weisen, datt eng Verfassungsreform onbedéngt néideg ass. Fir dee ganzen Text mam Public ze diskutéieren, dat wier schwiereg. An engem éischten Elan wier e Referendum zeréckbehale ginn, ma dat wier vläicht net déi richteg Decisioun gewiescht.

D'Chamber hätt bei hirer Informatiounsmissioun och villes kënne besser maachen, sou nach de Paul-Henri Meyers. Fir hie kéint een op de Wee goen, fir d'Zuel vun de Leit, déi e Referendum froen, op den Niveau ze setze vun der Initiative législative populaire, dat heescht vu 25.000 op 12.500.

Invité vun der Redaktioun: Paul-Henri Meyers

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.