En Donneschdeg de Moie war den CSV-Deputéierten eisen Invité vun der Redaktioun.

D’Ried vum Selenskyi an der Chamber huet net just e symbolesche Charakter. Där Meenung ass den CSV-Deputéierte Paul Galles, deen en Donneschdeg de Moien eisen Invité vun der Redaktioun war.

Et wier wichteg, dass een en Update kritt, wat een den Ament an der Ukrain bräicht. Donieft géing jo direkt no der Ried vum Selenskyi och nach een Debat gefouert ginn, wou d'Parteien hir Positioune kéinten duerleeën. D’CSV wier weiderhin dofir, dass d’Ukrain Waffeliwwerungen soll kréien. Et géif een nämlech dervun ausgoen, dass Russland scho virun der Invasioun mat Wirtschaftssanktioune gerechent a sech virbereet hätt. Dofir misst ee maximalen Drock maachen, fir Moskau nees un de Verhandlungsdësch ze kréien.

De Paul Galles sot dann, dass seng Partei och weiderhi fir en EU-Bäitrëtt vun der Ukrain wier, allerdéngs misst ee sech un déi valabel Prozeduren, d‘Kopenhagener Critèren, halen. Et géing eng strategesch Noutwendegkeet ginn, fir dës Prozedur bei der Ukrain anzeleeden, mä och bei anere Länner, besonnesch deenen um Balkan, déi och ënner russeschem Afloss kéinte stoen. Mä besonnesch d’Ukrain bräicht elo eng europäesch Perspektiv.

Och hei heem spiert een déi negativ Impakter vun dësem Krich, notamment déi héich Energiepräisser an d'Inflatioun. An den Aen vum CSV-Deputéierten ginn déi aktuell Mesuren aus dem Tripartitesaccord net méi duer, fir de Kafkraaftverloscht opzefänken. D'Situatioun géing permanent evoluéieren an dofir misst d‘Tripartite elo nach reegelméisseg beienee kommen. Et kéint net sinn, dass all d‘Indextranchen, déi eventuell verréckelt ginn, mateneen am Abrëll 2024 sollen ausbezuelt ginn. Dat misst een anescht organiséieren. Et kéint een och enger nächster Regierung dat Ee net an d'Nascht leeën.

Donieft géing d'Klimakris an souwisou d'Inflatiounskris hei zu Lëtzebuerg just nach de Problem vun de sozialen Ongläichheete verstäerken. E Problem, dee jorelaang ënnerschat gouf. Et hätt scho längst missen un enger Strategie géint d‘Aarmut an den Aarmutsrisiko geschafft ginn, mä dat wär ofgeleent ginn, et hätt ee just gepléischtert, esou de Paul Galles.

A punkto Politmonitor freet sech den Deputéierten natierlech iwwer de gudden Score vun der CSV, och wann een net dierft ze vill op ee Sondage ginn. D'Partei hätt natierlech eng turbulent a schwéier Zäit hannert sech an dat do Resultat géing elo weisen, dass nees Rou a Stabilitéit agekéiert wier.

Invité vun der Redaktioun: Paul Galles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.