En Freideg de Moie war de Responsabele vun der Kommunikatioun bei Unicef Lëtzebuerg eisen Invité vun der Redaktioun.

Et si schrecklech Zuelen, déi antëscht confirméiert sinn, an nach ass dat reellt Ausmooss no 100 Deeg Krich an der Ukrain jo nach guer net kloer. 225 Kanner sinn, den offiziellen Informatiounen no, zanter der russescher Invasioun an der Ukrain ëm d'Liewe komm. Dat sot de Kommunikatiounsresponsabele vun Unicef Lëtzebuerg, de Paul Heber, e Freideg de Moien als eisen Invité vun der Redaktioun.

All Dag stierwen op d’mannst 2 Kanner am Krichsgebitt an et ginn der 4 blesséiert.

5,2 Millioune Kanner aus der Ukrain sinn den Ament op humanitär Hëllef ugewisen. 8 Millioune Kanner goufen am eegene Land deplacéiert.

Fuerderung no direktem Waffestëllstand

Déi Jonk bräichte virop emol iwwerhaapt Protektioun, betount de Paul Heber. D'Unicef liwwert proppert Waasser, Liewensmëttel an hëlleft d'Educatioun vun de Kanner z'assuréieren. Et wier dowéinst awer kruzial, datt d’Mataarbechter iwwerhaapt emol Accès zu de Kanner kréien. Et wéisst ee wou se sinn, mä bei se bäizekommen, wier net einfach duerch dat militärescht Virgoen.

Prinzipiell fuerdert d'Unicef en direkte Waffestëllstand an der Ukrain. Dat wier déi grondleeënd Basis, fir op der Plaz anstänneg schaffen ze kënnen.

Méi Unicef-Mataarbechter zanter der russescher Invasioun

D’Hëllefsorganisatioun ass schonn zanter der Annexioun vun der Krim virun 8 Joer an der Ukrain aktiv. Antëscht ass och Personal bäikomm an et hätt een d'Aktivitéiten antëscht op d'ganzt Land ausgebreet. D'Unicef géif an engem Konflikt ëmmer méi Leit eraschécken. Dat wier hiert Mandat. Et kéint een d'Kanner net eleng loossen. Mataarbechter aus Sécherheetsgrënn hätt ee bis ewell nach net missen ofzéien. Si géifen natierlech awer punktuell duerch de Krich an hirer Aarbecht behënnert. An de leschten 100 Deeg gouf et ëmmer erëm Meldungen iwwer zivil Ziler, déi zerstéiert goufen. Schoulen, Klinicken, Gesondheetszenteren. Infrastrukturen vun der Unicef goufe bis ewell net an de Bombardementer getraff. Natierlech wier een als Organisatioun awer indirekt viséiert.

Rekordspende fir d'Ukrain, mä d'Sue ginn nach net duer

Wat d’Donen ugeet, hätt een eng Rekordzuel u Spende fir d'Ukrain kritt, esou de Porte-Parole vun Unicef Lëtzebuerg. D’Solidaritéit wier immens grouss gewiescht. Vill Sue géif eng ONG natierlech freeën. Et wier awer en zweeschneidegt Schwäert, well et bedeit, datt d'Problemer enorm grouss sinn. Virun allem wier och nach een Drëttel vun de finanzielle Besoinen an der Ukrain net ofgedeckt, sou de Kommunikatiounsresponsabelen. D’Sue ginn an der Ukrain selwer agesat, fir beispillsweis Infrastrukturen ze flécken, Schoul ze garantéieren oder einfach och just mol Waasser ze liwweren.

Ukrainkrich verschäerft Hongerkrisen

Duerch de Krich an der Ukrain goufe wichteg Versuergungsweeër gekappt. Länner zum Beispill an Ostafrika goufe vun Exporter aus der Ukrain an aus Russland ofgeschnidden, vun deene se fir d'Versuergungssécherheet awer ofhänken. Derbäi kënnt, datt vill vun de concernéierte Länner bei sech souwisou scho mat Dréchenten a schlechte Recolte konfrontéiert waren. An elo sinn och nach wichteg Importer ewechgebrach.

An Ethiopien, Kenia a Somalia géifen elo 10 Millioune Mënsche riskéieren un Honger ze leiden. D'Leit hätten do scho virum Ukrainkrich vun der Hand an de Mond gelieft. Wann d'Liewensmëttelpräisser, wéi elo klammen, kéinte si sech einfach näischt méi leeschten.

Invité vun der Redaktioun: Paul Heber

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.