En Donneschdeg de Moie war de Stater Schäffe Maurice Bauer eisen Invité vun der Redaktioun.

D'Kalbliddegkeet vu verschiddene Proprietäre vu Wunnengen oder miwweléierten Zëmmere wier relativ eekleg. Dat sot den CSV-Sozialschäffe vun der Stad Lëtzebuerg. De Maurice Bauer war en Donneschdeg de Moien eisen Invité vun der Redaktioun.

Invité vun der Redaktioun: Maurice Bauer

D'Gemeng Lëtzebuerg huet aktuell 600 Sozialwunnengen a 75 miwweléiert Zëmmeren. Donieft géingen awer och vill privat Zëmmere verlount ginn, Estimatiounen no ronn 2000 Stéck um Territoire vun der Stad. Theoretesch missten dës Zëmmeren all beim Schäfferot gemellt ginn, wat awer net de Fall ass. Dës héich Donkelziffer wier problematesch, well een net wéisst, wat sech do hannendru verstoppt.

Vill Proprietäre wiere korrekt, mee natierlech wieren och ëmmer schwaarz Schof derbäi. Verschidde Leit géingen dofir an Zoustänn liewen, déi een als Gesellschaft esou net acceptéieren dierft. Et géinge Fäll gemellt ginn, an deenen de Leit de Plaffong op de Kapp fält, déi d'Trap fort geholl kréien, wa se um éischte Stack wunnen oder déi Lächer an de Maueren no baussen hätten, ouni datt Fënsteren dra wieren.

D'Strofe fir esou Fäll missten däitlech eropgesat ginn, huet de Maurice Bauer gefuerdert. D'Gesetz vun 2019 géing net wäit genuch goen. A punkto Strofe kéint ee maximal den Equivalent vun 3 Méint Loyer froen. An den Ae vum Stater Schäffe missten se 10x oder 20x méi héich sinn, fir e klore Message ze ginn. Och d'Kontrolle vun der Stad Lëtzebuerg géingen elo verstäerkt ginn.

A punkto Sécherheetspolitik an der Stad kritiséiert de Stater CSV-Schäffen, dass d'Police net genuch Moyene vun der Politik géing kréien. Och vum Mesurëpak, deen d'lescht Joer vun der Regierung presentéiert gouf, hätt een um Terrain nach net vill gesinn. "Weise gëllt", sou de Maurice Bauer.

Schonn eng ganz Zäit laang wier net just d'Drogeproblematik e Sujet, ma och déi aggressiv Mendicitéit. Et géing awer net nëmmen ëm Repressioun goen. D'Stad Lëtzebuerg géif och op de soziale Volet setzen. Ënnert anerem mam Service "Street Work". Aktuell schaffe ronn 19 Sozialaarbechter a Streetworker an der Stad Lëtzebuerg, dobäi kënnt de Projet "A Vos Côtés". An et géif och op op Preventioun gesat ginn, zum Beispill an de Jugendhaiser.

D'Stad Lëtzebuerg ass den Ament och am Gaang mam Gesondheetsministère ze kucken, wou e Service fir drogenofhängeg Fraen an eng Maison de substitution kënne geschaaft ginn. Déi zwou Strukture sollen dezentral vum Drogekonsumraum Abrigado opgebaut ginn. Den Abrigado wier eigentlech eng ganz positiv Saach, huet de Maurice Bauer ervirgestrach, a wier do installéiert ginn, wou de Besoin war. Aktuell soll d'Fixerstuff och op där Plaz bleiwe wou se ass.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.