E Freideg de Moie war d'Soziologin an déi Responsabel vum Service DropIn eis Invitée vun der Redaktioun.

Zanter dem Ufank vum EXIT-Programm vum Service DropIn am Joer 2015 goufe 34 Kandidate begleet, dat sot um Freideg de Moien d'Soziologin Tessy Funck.

Beim Service DropIn vun der Croix Rouge kënnen zanter 1998 Sex-Worker anonym all Zort vun Hëllef froen. Dozou gehéiert och d'Begleedung, wann een der Prostitutioun wëll de Réck kéieren. Vun de 34 Kandidate konnten der 8 de Programm ofschléissen. De gréissten Defi, fir aus dem Prostitutiounsmilieu erauszekommen, wier déi komplett Ëmstellung vun de Liewensëmstänn. En Exit géif dowéinst normalerweis tëscht 2 an 3 Joer daueren. De Service DropIn schafft dofir och mat aneren Acteuren zesummen. Zum Beispill mat der ADEM, fir en neien Job ze fannen. Oder nach am Volet Logement, do huet de Service vun der Croix Rouge och selwer 3 Wunnengen zur Verfügung.

Vill Street Work um Terrain

De Service vun der Croix-Rouge hëlleft awer net nëmme beim Exit, mä ganz allgemeng wa Froe sinn, oder wann een och just schwätze wëll. Et kënne ganz einfach Saache sinn, wéi e Kaffi drénken oder d'Wäsch maachen, déi scho kënnen hëllefen. Ee Mol d’Woch gëtt dann och d’Méiglechkeet gebueden, fir sech medezinesch ënnersichen ze loossen.

Doriwwer eraus geet d’Ekipp vum DropIn vill op den Terrain, fir Street Work ze maachen, Kondomer auszedeelen oder einfach en oppent Ouer unzebidden. D'Aarbecht fänkt am Nomëtten un a geet fir gewéinlech bis Hallefnuecht.

Sex-Worker goufen an der Pandemie vergiess

D'Zäit vun der Pandemie hätt d'Aarbecht am Service, mee och an der Prostitutioun natierlech verännert. Allgemeng géing een elo keen eendeitegen Effekt dovunner méi gesinn.

Verschiddener hätte wéinst dem Lockdown opgehalen, anerer sech awer och lancéiert, zum Deel wéinst Geldproblemer. Déi sougenannt Sex-Worker wieren awer allgemeng an der Pandemie vergiess ginn, huet d'Invitée vun der Redaktioun kritiséiert. Fir deem entgéint ze wierken, hätt DropIn vill mat Organisatiounen zesummegeschafft an zum Beispill materiell Spenden un d'Leit verdeelt.

Prostitutioun: Nach ëmmer méi Fraen, mee Männer net vergiessen

De Service DropIn schafft den Ament un engem spezifesche Programm fir Männer, déi sech prostituéieren. Si wiere wuel an der Minoritéit, sollten awer net vergiess ginn. Zum Deel misst een op ganz aner Besoinen agoen, huet d'Tessy Funck erkläert. Fir de Programm auszeschaffen, gëtt och dowéinst geziilt mat männleche Sex-Worker zesummegeschafft, déi scho mol de Kontakt mam Service DropIn gesicht haten.

Fortkomme vu Stereotyppen 

Grënn, fir sech ze prostituéieren, géifen d'Leit der vill nennen, do géing et net deen ee Stereotyp ginn, esou d'Responsabel vum Service DropIn. Verschidde Leit géinge sech och just punktuell prostituéieren. Sief et virun der Rentrée, wa méi Schoulmaterial muss kaf ginn, fir de Studium, oder nach fir de Kanner eng Vakanz kënnen ze bidden.

De Problem vum Mënschenhandel besteet wuel hei am Land an de Service DropIn orientéiert betraffe Leit och un déi zoustänneg Servicer, wa si konkret no Hëllef froen. Der Soziologin war et wichteg ze betounen, dass den DropIn am Non-Jugement schafft an och net nofreet. Et setzt een dorop, dass d'Leit sech wuel fillen an engem dat uvertrauen, wat si wëllen. Et ass eng anonym Offer an d’Ekipp vu 7 Leit wier net do fir ze jugéieren.

Invité vun der Redaktioun: Tessy Funck

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.