E Méindeg de Moie war de Virolog an Immunolog am LIH eisen Invité vun der Redaktioun.

Et wäert sech net méi ëm Wochen handelen, bis en neien Avis iwwer d’Impfflicht virläit. E geneeën Zäitpunkt wollt de Professer a Virolog Dr Claude Muller awer net nennen. Hien ass ee vun den Experten, déi d’Regierung an der Fro vun enger Impfflicht beroden a war um Méindeg de Moien eisen Invité vun der Redaktioun. Et géif villäicht e bësse méi laang daueren, wéi d’Regierung gehofft hätt, mee d’Situatioun wär komplex. Eng Rei Saachen hätte sech geännert an déi ze gewiichte wär net sou einfach. Den Expertegrupp hat u sech eng Impfflicht fir d’Personal am Gesondheetssecteur a fir Leit iwwer 50 Joer recommandéiert.

Aktuell gëtt sech natierlech och op den Hierscht an méiglech nei Variante vum Virus virbereet. Do wier et decisiv, dass een e gesetzleche Kader hätt, wou e kéint reagéieren, ouni all Kéiers e neit Gesetz ze brauchen, esou den Dr Muller. Et hätt een op alle Fall scho Modeller prett leien, fir op all Variante kënnen ze reagéieren. Dës Woch wäert jo dann och d'Maskeflicht am ëffentlechen Transport ewechfalen. An de Spideeler an an den Altersheemer muss ee weiderhin d'Mask unhalen. An do soll een effektiv virsiichteg sinn, mengt de Virolog. Et wär richteg, dass ee lues mécht. Et misst ee weider ganz geziilt déi vulnerabel Leit schützen.

Déi aktuell Impfstoffer sinn net spezifesch fir déi aktuell Varianten, mä soulaang keng aner do sinn, wären déi aktuell gutt a géife géint schwéier Verleef schützen. Eng nei Boosterimpfung wär also sécher sënnvoll, well d’Wierkung vum Vaccin noléisst, mengt de Professer Muller.

Nach op d’Afepouken ugeschwat, do misst ee sech net ze vill Suerge maachen, esou de Virolog. Just well mer elo eng Pandemie haten, géif dat net heeschen, dass eng nei géif kommen, esou den Expert.

Invité vun der Redaktioun: Professer Dr. Claude Muller

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.