E Mëttwoch de Moie war de Gouverneur vun der Lëtzebuerger Zentralbank eisen Invité vun der Redaktioun.

Am Juli wëll d'europäesch Zentralbank, d’EZB, d’Zënse vun 0 op 0,25% an d'Luucht setzen. No der éischter Hausse bannent 11 Joer gëtt et am September eng weider Hausse, méiglecherweis vun 0,50%, sou de Gouverneur vun der Lëtzebuerger Zentralbank, de Gaston Reinesch, e Mëttwoch am RTL-Interview. No September kéint et weider graduell Haussë ginn, well a sengen Aen d’Inflatioun net just héich ass, mee "dramatesch ze héich" wier.

Et wier am Moment eng ganz komplizéiert Situatioun. Et wier een op engem ganz schmuele Grat, sou de Gaston Reinesch. Well d’europäesch Zentralbank engersäits d’Mandat huet, fir Präisstabilitéit ze suergen – mam Objektiv iwwer puer Joer bei 2% Inflatioun ze leien – an d’Inflatioun elo ebe vill méi héich ass. A well op der anerer Säit de Risiko vun enger Rezessioun géing bestoen, ebe grad och wann een "ze vill, ze séier mécht". Well aktuell d’Ekonomie an den Emploi awer éischter gutt do stéingen, hätt d’EZB sech entscheet, d’Zënsen an d’Luucht ze setzen. Och wann d’Zënse graduell eropginn, riskéieren dann net Leit, déi Prête gemaach hunn oder Ekonomien ewéi déi italienesch net an d’Bredouillen ze geroden? "Mir soen natierlech och, mir si flexibel, mee mir mussen ëmmer d’Situatioun kucken, ewéi se evoluéiert", sou de Gouverneur vun der Zentralbank.

War een nach viru puer Méint dovunner ausgaangen, datt d’Präisdeierecht just temporär wier, sou koum et no der staarker Reprise vun der Demande no der Covid-Kris Enn d’lescht Joer am Februar jo zur Aggressioun vu Russland géint d’Ukrain. Fir déi méi labber Geldpolitik vu bis elo ze rechtfäerdegen, huet de Gaston Reinesch och e puer Mol méi wäit no hanne gekuckt an de Kontext erkläert. Éischtens war d’Inflatioun jorelaang niddreg an d’Croissance schwaach. Zweetens war d’Zentralbank, ebe grad fir d’Ekonomie z'ënnerstëtzen, generéis mat de Banken. Hien huet erkläert, datt déi lescht 2 Joer d’Banken zwar -0,5% Zënse kruten, also hu misse bezuelen, fir Suen op den Zentralbanken ze placéieren, gläichzäiteg se awer zu -1% Suen hätte kënne léinen. Dat wier e Subsid gewiescht.

Wat d’Mesurë vun der Tripartite uginn, sot de Gaston Reinesch, hie géing am Prinzip gutt fannen, datt an Zäite vun héijer Inflatioun den Index moduléiert gëtt an d’Kompensatiounsmesurë géingen och Sënn maachen. Allerdéngs géing him eppes am Debat hei am Land feelen. Well d’Inflatioun gréisstendeels importéiert wier, géingen Importer méi deier ginn ewéi d’Exporter. "Dat heescht de Kuch gëtt einfach méi kleng an da stellt sech natierlech eng Problematik vun Ëmverdeelung", sou de Gaston Reinesch.

Invité vun der Redaktioun: Gaston Reinesch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.