Dat war eng vun den Aussoe vum President vun der Lëtzebuerger Landjugend a Jongbaueren. Hie war e Méindeg eisen Invité vun der Redaktioun.

Et ass mat weideren Enkpäss bei der Liewensmëttelversuergung ze rechnen, wa politesch op EU-Niveau keng Decisioune geholl ginn, fir zum Beispill Kären ze deblockéieren, déi um Schwaarze Mier stockéiert sinn. Dat seet de Luc Emering, President vun der Landjugend an de Jongbaueren als eisen Invité vun der Redaktioun.

De Krich an der Ukrain huet jo och fir eng Hausse bei den Düngemëttel- an Energiepräisser gesuergt. Dowéinst wieren zum Deel och Produite vu Lëtzebuerg méi deier ginn. An déi kéinte nach weider klammen, wa politesch net entgéint gesteiert gëtt. Net ze vergiessen, dass de Liewensmëttelmanktem an d'Problemer an de Liwwerkette wuel déi méi aarm Populatiounen op der Welt treffen, och dowéinst misst koordinéiert gehandelt ginn.

Lëtzebuerg a verschiddene Secteuren autark

Lëtzebuerg wier autark, wat d'Produktioun vu Mëllech ugeet. Och beim Rëndsfleesch wär ee net schlecht opgestallt, mengt de jonke Bauer. Mä d'Schwéngsproduktioun hei am Land wär defizitär. Mat Eeër, Gefligel, a virun allem Geméis an Uebst kéint ee sech net selwer versuergen zu Lëtzebuerg. Hei léich ee bei ënner 7 Prozent Autarkie.

Dofir bedauert de Luc Emering, dass et bei den Ziler vun der Regierung fir d'Agrikultur sou vill Inkoherenze géif ginn. D'Prozedure wieren immens laang. Dem President vun der Landjugend an de Jongbaueren no misst et méiglech sinn, fir Zären och an enger Gréngzon ze bauen, fir ebe méi onofhängeg ze gi bei der Produktioun vu Geméis an Uebst. Ma hei géing et awer zum Deel méintlaang daueren, bis en Dossier verschafft gëtt.

"Et feelt un interministerieller Kommunikatioun"

Doriwwer eraus géing et aktuell u Kommunikatioun tëscht de Ministère feelen, huet de Luc Emering kritiséiert. Et misst ee wuel fair bleiwen an de neie Ministere Claude Haagen fir d'Landwirtschaft a Joëlle Welfring fir d'Ëmwelt Zäit loossen, sech an d'Dossieren eranzeschaffen. Ma déi jonk Bauere bedaueren awer, dass net méi zesummegeschafft gëtt. Notamment och fir d'Landwirtschaft an den Ëmweltschutz méi ze verbannen.

D'Regierung hätt zwar grouss Ziler, och wat d'Biolandwirtschaft ugeet. Ma et géing een awer Inkoherenze feststellen, wat d'Ëmsetzung um Terrain ugeet. Ee Beispill wier d'Kritik vum ze héije Véibestand hei am Land. Ma et géingen awer och am Agrargesetz net genuch Alternativen dozou gebuede ginn. Virun allem jonke Bauere géing dat keng Perspektiv bidden, fir e Betrib opzebauen.

Donieft huet de President vun der Lëtzebuerger Landjugend a Jongbaueren ugemierkt, dass net genuch mam Terrain géing zesummegeschafft ginn. Et wier zwar e Kären- a Schwéngsdësch aberuff ginn, fir de Besoine vun de Baueren entgéint ze kommen, mä déi jonk Bauere waren op dës Reunioun net invitéiert.

Invité vun der Redaktioun: Luc Emering

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.