Dat sot de President vun der Federatioun vum "Génie Technique". Hie war um Dënschdeg de Moien eisen Invité vun der Redaktioun.

D’Nofro ass ganz héich. D'Betriber géifen déi vill Demanden den Ament net packen. Wéinst der Energiekris wëllen ëmmer méi Leit eng Wärmepompel oder eng Photovoltaikanlag. Dat nach virum Wanter. Mä et misst ee Gedold hunn, sot de Marc Thein am RTL-Interview. Hien ass de President vun der Federatioun vum Génie Technique (FGT), wou Elektrotechnik, Heizung a Sanitär drënner falen, a war de Moien eisen Invité vun der Redaktioun.

D’Betriber géife reegelrecht mat Ufroen iwwerrannt ginn. Vill kleng Betriber hätten och nach net de Switch gemaach, si schaffen nach net mat den neien Techniken, mä hunn zum Beispill nach mat de klassesche Masuttsheizungen genuch ze dinn.

Nach kéint ee schaffen, d’Material wär knapp, mä et géif goen. Mä wéi et d’nächst Joer ausgesäit, wéisst een net. Vun 2023 un däerfen an neier Gebaier keng Masutts- oder Gasheizunge méi installéiert ginn. Och genuch a gutt forméiert Personal ze hunn wär eng Erausfuerderung.

Datt vum nächste Joer un an neie Gebaier d’Wärmepompel gréisstendeels gefrot ass, géif op alle Fall nach méi Aarbecht an en Challenge fir de Secteur bedeiten. Seng al Masutts- oder Gasheizung duerch eng Wärmepompel ersetzen, wier net sou einfach. Et bräicht ee groussflächeg Heizkierperen. Hei wier eng gutt Berodung ganz wichteg. Bei engem ganz kale Wanter géife soss Wärmepompele riskéieren net duer ze goen, sou de Marc Thein.

Photovoltaikanlage sinn den Ament och staark gefrot. Déi produzéiere Stroum. Just waarmt Waasser gëtt haut net méi gemaach. Den Daach muss d’Laascht packen, soll Richtung Süden orientéiert sinn, fir datt et sech rentéiert, an net ze vill Gauben oder Daachfënsteren hunn.

Energie spuere kéint een natierlech och als Privatmann oder -fra, och wann an der Industrie de gréisste Potential wär. Mä allgemeng misst et net ëmmer sou waarm oder kal sinn, wéi ee villäicht mengt. Ee Grad méi oder manner géif schonn en Ënnerscheed beim Verbrauch maachen.

Invité vun der Redaktioun: Marc Thein

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.