De Chef d'Etat Major huet op d'Zukunft vun der Lëtzebuerger Arméi gekuckt. De Steve Thull war eisen Invité vun der Redaktioun.

Mer wäerten eng aner Arméi an Zukunft ginn, duerch dat neit strategescht Konzept vun der NATO. Dat sot e Freideg de Moien de Chef d’Etat Major vun der Lëtzebuerger Arméi Steve Thull als eisen Invité vun der Redaktioun nom Ofschloss vum Nato-Sommet dës Woch zu Madrid. D'Arméi wier gutt opgestallt, fir den zukünftegen Erausfuerderunge Rechnung ze droen.

D'NATO-Partnerlänner sollen an Zukunft op mannst 2% vum PIB an d'Defense investéieren. De Grand-Duché kritt dat net hin. Vill méi huet d'Regierung decidéiert, d'Militärausgabe bis fréistens 2028 vun haut 0,6% op 1% vum PIB eropzeschrauwen. Ma dat ass nach ëmmer e considerabelen Effort fir Lëtzebuerg.

Hei wier et wichteg gewiescht z'erklären, wéi schwéier respektiv surrealistesch et fir eist kleng Land mat senger vergläichsweis klenger Arméi wier, fir dat Zil z'erreechen, sou de Steve Thull. Dat hätt ee senger Meenung no awer gutt fäerdeg bruecht.

Datt Lëtzebuerg duerch eng manner héich finanziell Contributioun manner vun der NATO geschützt gëtt, wier net de Fall. D'Allianz géif fir jiddereen astoen. D'Länner, déi manner investéieren, wieren awer dacks negativ konnotéiert. Duerfir wier et wichteg, datt d'Zaldote vun der Lëtzebuerger Arméi um Terrain iwwerzeegen.

Lëtzebuerg wäert bis 2028 ronn eng Milliard Euro fir d'Arméi ausginn, wäit méi wéi bis elo. De Grand Public misst sech bewosst sinn, datt d'Arméi an d'Defense dozou bäidroen, de Fridden z'erhalen, betount de Chef d’Etat Major. Duerfir wieren déi zousätzlech Suen an d'Defense och gutt ugeluecht.

D'Arméi war dem Steve Thull no enk an d'Ausschaffe vun der zukünfteger Strategie mat agebonnen. Duerfir kann de Chef d'Etat Major voll a ganz hannert den annoncéierte Prioritéite stoen. Fir d'Ziler z'erfëllen, ass d'Arméi awer op zousätzlech Leit ugewisen. An deem Kontext waart de Steve Thull drop, datt d'Reform vum Arméisgesetz endlech Realitéit gëtt. De Gesetztext, mat deem an Zukunft ënnert anerem d'Basisformatioun op véier Joer eropgeet an d'Arméi och op Bachelor a Primaner-Niveau rekrutéiere kann, gouf zejoert deposéiert. Bis elo huet de Staatsrot en awer nach net aviséiert.

Dës nei Kaderbedéngungen, do ass de Steve Thull dovunner iwwerzeegt, géif d'Arméi awer méi interessant géintiwwer aner Karriäre maachen an hëllefen, méi Leit ze fannen. Donieft misst een et fäerdeg bréngen, d'Leit, déi an d'Arméi kommen, ze fideliséieren, fir datt se och méi laang hir Missiounen erfëlle kënnen. All Joers wéilt een allgemeng kucken, eng 30 Militär méi ze kréien. Duerfir géif een awer dat neit Gesetz brauchen.

De gréissten Deel vun den zousätzleche Militärausgabe wäert an noer Zukunft an e neie Batailloun fléissen, dee Lëtzebuerg zesumme mat der Belsch wäert opbauen. Wéi genee d'Struktur ausgesäit, wier nach net kloer, mä et leeft drop eraus, dass bis 2028 eng 350 Lëtzebuerger dodra wäerte vertruede sinn, sot de Chef d'Etat Major. Donieft sinn notamment verstäerkt Investissementer am Cyber-Beräich, Satellitten an Iwwerwaachung geplangt.

Invité vun der Redaktioun: Steve Thull

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.