De Landwirtschaftsminister war e Méindeg eisen Invité vun der Redaktioun.

D'Regierung, respektiv d'europäesch Unioun wëllen "geziilt" deene Secteuren an der Landwirtschaft hëllefen, déi am meeschten ënnert den héijen Energie- a Matière-Premières-Präisser leiden. Dat sot de Landwirtschafts-a Sozialminister Claude Haagen de Méindeg de Moien hei op RTL. Et wier awer nach näischt a Stee gemeesselt.

Zwee Punkte ginn aktuell nach op europäeschem Niveau diskutéiert, fir ekologesch Oplagen esou unzepassen, datt d'Bauere bësse méi Loft kréien: engersäits d'Reiefolleg, d'Rotatioune vu Land, dat ugebaut gëtt an anersäits d'Still-Legungs-Flächen. Lëtzebuerg waart wéi déi aner Memberstaaten dann och op d'Äntwert vun der EU-Kommissioun op den nationale Strategiepabeier, deen de Regierungsrot am Januar ugeholl huet, sou de Claude Haagen. Dat hätt nämlech och en Afloss op dat neit Agrargesetz an d'Subventiounspolitik kréien.

Läit d'Äntwert bis vir, géing och nach emol mat den Acteuren aus der Landwirtschaft dann diskutéiert ginn. De Minister sot, et géing "sportlech ginn", fir dat neit Gesetz wéi geplangt Ufanks d'nächst Joer an dréchenen Dicher ze hunn. Wann dat am Fréijoer wier, wier dat a sengen Aen awer och OK, mee et misst een eng Transitiounsperiod dann decidéieren.

Datt Landwirtschafts- an Ëmweltministère net genuch géinge matenee kommunizéieren, dat stëmmt net, sou de Claude Haagen. Hie géing d'Ëmweltministesch reegelméisseg gesinn. Datt et Diskussioune ginn, wier normal, mee et géing een ëmmer Kompromësser fannen, déi am Interêt vum Agrarsecteur a vum Ëmweltschutz wieren.

Sozialkeesen "gutt opgestallt"

De Claude Haagen ass och Sozialminister. Ugeschwat op den Defizit vun der Gesondheetskeess sot hien: "d'CNS ass keng Bank". Wann een de Leit méi Servicer an Déngschtleeschtunge géing wëlle ginn, da géing dat och eppes kaschten. Mee et géing een d'finanziell Entwécklung natierlech och am A behalen. Hien huet awer ënnerstrach, datt d'Reserv zwee Mol esou héich ass nach ewéi de gesetzleche minimale Seuil vun 10% vun de Joresausgaben.

Änlech huet de Sozialminister d'Situatioun bei der Pensiounskeess kommentéiert. Déi wier aktuell "gutt opgestallt". Ugeschwat op d'Remark, datt laut Prognosen d'Depensë wäerten iwwert d'Recettë klammen, huet hien op e Rapport technique vun der Generalinspektioun vun der Sécurité Sociale fir déi nächst 10 Joer higewisen. Mi-Terme, also a 5 Joer, géing eng weider Analys gemaach ginn. Wann de System eng Kéier net méi opgeet, da kéint een iwwert méi héich Cotisatiounen nodenken. Leeschtunge kierzen, "dat maache mer op kee Fall", sou de Claude Haagen.

Invité vun der Redaktioun: Claude Haagen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.