En Dënschdeg de Moie war de Premier Conseiller de Gouvernement eisen Invité vun der Redaktioun.

E Freideg ass et ee Joer hier, datt et déi uerg Iwwerschwemmungen am Land gouf. Zanterdeem gouf den Héichwaasserschutz verbessert, sot en Dënschdeg de Moien den André Weidenhaupt. Hien ass Premier Conseiller de Gouvernement am Ëmweltministère a war eisen Invité vun der Redaktioun.

Invité vun der Redaktioun: André Weidenhaupt

Bei 41 Peegelen am Land gëtt reegelméisseg de Waasserstand gemooss. D'Internetsäit inondations.lu gouf iwwerschafft an am Hierscht kënnt och eng App eraus (Meine Pegel – an Zesummenaarbecht mat Däitschland an Holland), fir nach méi präzis iwwer de Peegelstand a senger Géigend informéiert ze sinn.

D'Héichwaasser-Kaarte goufen och verbessert, wéi héich d'Waasser ka klammen, a wou et hileeft. 17 Baachen a Flëss sinn do erfaasst, d'Gander an d'Chiers koume bäi.

Gewässer ginn och gebotzt a renaturéiert, fir datt d’Waasser besser ofleeft. 10 Milliounen Euro goufen dofir deblockéiert. Allgemeng mussen d'Servicer, d'Verwaltungen an d'Gemenge besser zesumme schaffen, esou den Invité. Iwwer 50 Reunioune gouf et dowéinst an deem leschte Joer, sot den héije Beamten aus dem Ëmweltministère.

D'Dréchent ass aktuell och e grousse Problem. D'Drénkwaasserversuergung ass fir de Moment garantéiert. Drénkwaasser-Reserve bilde sech am Wanter, mee et gëllt awer aktuell eng Sensibiliséierungs-Phas, wou een op säi Waasserverbrauch soll oppassen. Wann et sou waarm ass, klëmmt de Waasserverbrauch. De Reseau gesäit awer just eng 200 Liter den Dag pro Kapp vir. Wann et laang méi dréche bleift, gräift d’Phase de vigilance, wou soll Waasser gespuert ginn. D'Situatioun ass awer jee no Gemeng ganz verschidden, well d’Infrastrukture verschidde sinn.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.