Dat sot d'Gesondheetsministesch am Kontext vun der Pandemie an der Impfflicht. Si war e Mëttwoch de Moie war eis Invitée vun der Redaktioun.

Och wann d'Regierung sech an der ablécklecher Situatioun dogéint ausgeschwat huet, kann een et net ausschléissen, datt et net awer nach zu enger Impfflicht géint de Corona kënnt, dat sot en Donneschdeg d'Gesondheetsministesch Paulette Lenert am RTL-Interview. Si war en Donneschdeg de Moie virun der Regierungsdeklaratioun iwwert d'Impfflicht an der Chamber eis Invitée vun der Redaktioun. Et géif elo zielen, fir den Hierscht preparéiert ze sinn. An der Vergaangenheet hätt ee geléiert, wéi séier ee kal erwëscht ka ginn. D'Gesetztexter gi lo mol virbereet, fir wa se awer sollte gebraucht ginn.

Konditioune fir d'Impfflicht sinn den Ament einfach net ginn

Datt d'Regierung den Ament sech géint d'Aféierung vun enger Impfflicht vu 50 Joer un decidéiert huet, géif och dru leien, datt ee keng Garantie hätt, datt d'Impfflicht och den néidegen Effekt hätt, sou d'Paulette Lenert, déi an der Fro ëmmer éischter retizent war. Wann ee sou en déifgräifenden Agrëff an d'Fräiheet mécht, da misst een awer schonn doduerch e kloren Impakt op d'Spideeler gesinn.  Dat wier den Ament awer einfach net ginn. D'Paulette Lenert huet hei d'Beispiller Italien a Griicheland genannt. D'Impftauxe wieren hei maximal 5% duerch d'Impfflicht an d'Luucht gaangen.

Gudde globalen Impfschutz

30.000 Persounen iwwer 50 Joer si bis elo nach guer net géint Covid geimpft. Si wier sech bewosst, datt een antëscht bei deene Leit ukomm ass, déi sech schwéier dinn, sou d'Ministesch. Duerfir wieren dës Persounen alleguerten nach emol perséinlech ugeschriwwe ginn. D'Iwwerzeegungsaarbecht géif awer sécher just a klenge Schrëtt goen. Global gesinn, hätte mer zu Lëtzebuerg awer duerchaus e gudden Impfschutz mat engem Impftaux vun 83% iwwer 18 Joer. Ouni Vaccin wiere mer sécher net a sou enger entspaanter Situatioun an de Spideeler wéi esou. Wat vläicht falsch duergestallt gi wier, sou d'LSAP-Ministesch, ass datt d'Impfflicht de Schlëssel wier, fir d'Pandemie op en Enn ze bréngen.

Geschwënn och Booster vu 60 Joer un zu Lëtzebuerg

E geneeën Datum, wéini den adaptéierten Omikron-Vaccin an Europa disponibel ass, huet och d'Gesondheetsministesch net. Fir den Ament géif September, Oktober am Raum stoen.

D'Booster-Campagnë lafen den Ament nees. Do wier awer nach Aarbecht do, huet d'Ministesch zouginn. Bis elo hu sech nëmme ronn d'Hallschent vun de Leit iwwer 80 Joer nach emol boostere gelooss. Dobäi hätten d'Experte kloer insistéiert, datt de beschte Schutz, deen ass, wann ee frësch geimpft ass. D'Gesondheetsministesch huet och an Aussiicht gestallt, datt Lëtzebuerg kuerzfristeg och den zweete Booster fir Leit iwwer 60 Joer opmécht. Esou wéi déi europäesch Gesondheetsautoritéiten et proposéiert hunn. Leit, déi besonnesch engem Risiko exposéiert sinn, sollten net zécken a sech direkt eng weider Kéier impfe loossen.

Optimistesch Ministesch

D'Paulette Lenert sot sech en Donneschdeg de Moien optimistesch iwwert de weidere Verlaf vun der Pandemie. Et misst ee sech wuel op dat Schlëmmst preparéiere fir den Hierscht. Et géif awer duerchaus och d'Méiglechkeet am Raum stoen, datt d'Pandemie lues a lues ausleeft. D'Weltgesondheetsorganisatioun hat dës Woch gewarnt, Covid wier nach net eriwwer.

Invité vun der Redaktioun - Paulette Lenert (13.07.2022)

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.