Dat Gefill huet de President vun der Bauerenzentral. De Christian Wester war eisen Invité vun der Redaktioun.

De Karschnatz huet dëst Joer 2 bis 3 Wochen éischter ugefaange wéi gewinnt. Ma d'Qualitéit vun de Käre schéngt fir den Ament nach allgemeng an der Rei ze sinn, dat sot de President vun der Bauerenzentral Christian Wester bei eis op der Antenn. Duerch d'Dréchent wieren d'Kären awer an hirem Ertragspotential ausgebremst ginn, well se éischter zeideg goufe wéi normal. Derbäi kéim, datt d'Gras den Ament net méi sou séier wiisst. Dat heescht, datt d'Baueren elo un hir Fudderreserve musse goen, fir d'Kéi iwwert de Summer ze kréien. Besonnesch de Mais vun dësem Joer misst engem awer den Ament Kappzerbrieches maachen. Dee géif plazeweis dach "aarmséileg" do stoen, sou de Christian Wester.

Dem President vun der Bauerenzentral no géif et awer och lokale Ënnerscheeder, jee nodeem, wéi vill et gereent huet oder eben net.

D'Inflatioun dreift d'Leit an den Discounter

Wat d'Baueren awer all Dag géife spieren, dat wieren déi héich Produktiounskäschten. Och wann d'Leit méi fir hir Liewensmëttel mussen ausginn, géif dovunner nëmmen e Brochdeel beim Bauer ukommen. Vill méi géif ee mierken, datt duerch d'Inflatioun den Ofsaz vu lokalen, Lëtzebuerger Produiten zréckgeet an am Discounter dogéint méi kaf gëtt. An Zäiten, wou d'Geld knapp ass, géifen d'Consommateuren eben spueren an op Luxus verzichten, seet de Christian Wester.

Landwirtschaft  direkt vum Klimawiessel betraff

D'Landwirtschaft wier deen éischte Secteur, dee vum Klimawiessel direkt betraff ass, sou de President vun der Bauerenzentral, an et wier een natierlech amgaangen, zum Beispill no Zorten ze kucken, wéi méi resistent sinn. D'Betriber wieren do permanent dobäi, sech nei opzestellen. Um Enn géif engem näischt aneres iwwreg bleiwen, fir sech un d'Klimagegebenheeten unzepassen.

Planungssécherheet bei der Broochleeë vun de Fläche gefuerdert

Déi nei europäesch Agrarpolitik schreift vir, datt 4 Prozent vun de Fläche brooch geluecht musse ginn, am Sënn vu méi Nohaltegkeet a méi Biodiversitéit. Dat Zil, wat een Element vum sougenannten "europäesche Green Deal" ass, gëtt et zanter dem Krich an der Ukrain nach Fro gestallt. Och d'Lëtzebuerger Bauerenzentral gesäit déi verflichtend Broochleeung kritesch. Wéi aner Bauereverbänn och argumentéiert de President vun der Bauerenzentral mat der moralescher Verflichtung, déi een hätt fir am aktuelle Kontext d'Produktiounsflächen eropzesetzen. Donieft géif Lëtzebuerg souwisou scho vill am Beräich vun Agrarëmweltprogrammer maachen. Dat géif awer net an deem Mooss vu Bréissel honoréiert.

Dem Christian Wester no missten d'Baueren elo endlech wëssen, wou se dru sinn, fir den Ubau fir den Hierscht a Wanter anstänneg plangen ze kënnen. Fir den Ament ass dat lescht Wuert op EU-Niveau awer nach net gesprach.

De Landwirtschaftsminister Claude Haagen wier allgemeng oppe fir Dialog. Et wier wierklech vill geschwat ginn. Duerfir stéing de Minister awer och elo an der Flicht, fir ze soen, wéi hie sech déi verschidde Saache virstellt.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.