En Dënschdeg de Moie war d'Inneministesch eis Invitée vun der Redaktioun.

D’Reform vun der kommunaler Grondsteier an eng nei national Spekulatiounssteier ginn am Hierscht presentéiert. D’Aarbechte si bal ofgeschloss, sou d’Inneministesch Taina Bofferding um Dënschdeg de Moien hei op RTL. Detailer, ewéi d’Steiersätz, bleiwen ze klären an d’Matière wier ganz komplex. Den Timing, deen de Premier Xavier Bettel a senger Ried zur Lag vun der Natioun d’lescht Joer festgeluecht hat, kéint trotzdeem agehale ginn. Eng nei Berechnungsformel wier prett. Wa puer Detailer bis gekläert sinn, kéinten déi "spannend" oder "politesch" Diskussiounen ugoen, sou d’Taina Bofferding: "ebe wéi héisch soll den Taux gesat ginn a gëtt eventuell vläicht en Deel Steierbefreiung".

D’Inneministesch huet rappelléiert: D’Berechnungswäerter fir d’Grondsteier ginn op 1941 zeréck. En Anachronismus. An eng Fro vun der Gerechtegkeet. D’LSAP-Politikerin huet betount: mat der Reform vun der Grondsteier géing et net drëms goe fir d’Keesen ze fëllen, mee fir Terrainen opgrond vun hirem reelle Wäert ze besteieren. Ganz wichteg wier dann och d’national Spekulatiounstax, oder wéi d’Taina Bofferding se léiwer nennt: d’Mobilisatiounssteier. Eng Steier fir "déi Leit, déi sech wierklech eng gëlle Nues domadder verdéngen, datt se Terrain brooch leie loossen".

De Staatsrot huet bei anere Gesetzprojeten, wéi deen iwwert de Baulandvertrag Bedenken ausgedréckt oder souguer Widderstand geleescht. Dat wéinst juristeschen Onkloerheeten an eng Gefor fir d'konstitutionellt Recht op Besëtz. Riskéiert d’Spekulatiounstax net zerrappt ze ginn? D’Taina Bofferding äntwert: "Mir sinn eis awer Eens hei am Land, datt mir contraignant Instrumenter brauchen a grad eben och géint d’Spekulatioun musse virgoen".

D’Recettë vun der Grondsteier ginn un d’Gemengen. D’Recettë vun enger Spekulatiounstax, déi géingen un de Staat goen. Soulaang d’Politik sech net iwwert d’Taux’en Eens ass, kann een och net spekuléiere wéi vill déi Steiere géingen erabréngen. A soulaang een d’Tauxen net kennt, kann ee sech och net molen, ob d’Steieren tatsächlech d’Spekulatioun ënnerbanne wäerten.

Invité vun der Redaktioun: Taina Bofferding

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op ass d'Emissioun dono och am Replay ze fannen.