Dat sot d'Presidentin vun der Nationaler Associatioun vun den Infirmièren e Mëttwoch als eis Invitée vun der Redaktioun.

Et ass net nei: den Haaptgrond, firwat nach ëmmer déi meescht Leit hire Beruff am Gesondheetssecteur opginn, ass déi grouss Aarbechtslaascht. Dat confirméiert d'Presidentin vun der ANIL, der Lëtzebuerger Associatioun vun den Infirmièren e Mëttwoch de Moien am Interview.

Och den Ëmgang mateneen an an der Ekipp hätt sech besonnesch wärend der Pandemie verännert an et géing ee sech dacks froen, wat een um Terrain iwwerhaapt nach leescht. D'Belaaschtung wier virop net duerch d'Masken, déi ee misst undoen, mee well een d'Gefill huet, wann een heem geet, dass een net alles gemaach hätt, wat een hätt misse maachen. 35 Prozent vun den Infirmièrë wiere souguer scho moies beim Gedanken midd, dass den neien Aarbechtsdag ufänkt, erkläert d'Anne-Marie Hanff. Dat hätt e groussen Impakt op d'Privatliewen. 70 Prozent géingen och soen, dass se bal ni Energie hätten, fir hiert Privatliewen, well een net méi sou gutt recuperéiere kann.
Et wier een aktuell dann och an enger brenzeleger Situatioun, wat den Nowuess ugeet. 40 Prozent vun den Infirmièren an Infirmieren am Land sollen an den nächste Joren an d'Pensioun goen an een Drëttel géing dacks mam Gedanke spillen, fir de Beruff ze verloossen. An donieft géingen ëmmer manner Leit sech am Lycée fir Gesondheetsberuffer, dem LTPS, aschreiwen, fir de BTS ze maachen. Dat well eng grouss Onsécherheet do wier. Vill Reforme stéingen am Raum an et géing un Informatioune feelen, sou d'Anne-Marie Hanff.

Eigentlech sollt de Bachelor fir Infirmièren an Infirmieren, dee schonn zanter Jore vun der ANIL gefuerdert gouf, elo dëst Schouljoer schonn ufänken, mee dat hätt net geklappt. Wat wichteg wier, wier, dass et ee praktesche Studiegang géing ginn an et soll interdisziplinär geléiert ginn, zum Beispill zesumme mat Medezinsstudenten. Iwwer 90 Prozent vun de Schüler, déi aktuell e BTS maachen, géingen uginn, dass se eigentlech léiwer ee Bachelor géinge maachen amplaz e BTS an deementspriechend géing dat och erklären, firwat sech aktuell manner Schüler am LTPS ageschriwwen hunn. Dofir bräicht et elo konkret Informatiounen zum Beispill, dass wann een elo e BTS géing maachen, deen awer voll als Bachelor géing unerkannt ginn oder, dass ee kéint weidergoen an de Bachelor. A Frankräich hunn déi meescht Infirmièren e Bachelor, erkläert d'Invitée. Zwee Drëttel vun den Infirmièren hei am Land géingen aus dem Ausland kommen an deemno wier d'Aféiere vum Bachelor och gutt, fir eng Zort Ugläichen ze schafen.

En Vue vum Hierscht an enger eventueller neier Corona-Well wier et gutt, fir Sprénger-Ekippen ze schafen, déi bei Bedarf kënnen asprangen, wa Leit ausfalen an och méi performant Computere wieren absolut néideg, sou nach d'Presidentin vun der ANIL.

Invité vun der Redaktioun: Anne-Marie Hanff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.