Dat sot e Freideg de Moien de President vum Landesverband als eisen Invité vun der Redaktioun.

Alles op d’Schinn, seet de President vum Landesverband, der gréisster Eisebunnsgewerkschaft am Land. De Georges Merenz war eisen Invité vun der Redaktioun.

Et géif scho vill gemaach ginn, mä et kéint een nach méi maachen. Nei Linne solle kommen an op enger Streck wéi Biissen missten nees Persounenzich fueren. De ganze Fret misst vun der Strooss eriwwer op d’Schinn.

D'Aggressiounen am ëffentlechen Transport wären an de Covid-Zäiten staark zréckgaangen, mä hätten awer elo nees zougeholl, well nees méi Leit mam Zuch fueren. D'Maskeflicht hätt warscheinlech och negativ derzou bäigedroen, erkläert de Georges Merenz. Allgemeng hätt sech d'Angscht vun den "doudege Garen", also dass d'Garen duerch den ëffentlechen Transport eidel bleiwen, awer net confirméiert. Et wier ee sech mam Minister nämlech eens ginn, fir Agents d’accueil anzesetzen. Do géinge Pilotprojete lafe wéi zum Beispill zu Miersch, wou da kee Guichet méi ass, mee op d'mannst eng Persoun, déi op d'Leit kéint oppassen an Informatioune ginn, sou de President vun der gréisster Eisebunnsgewerkschaft.

De Landesverband war och den 1. Mee op der Maniff géint d'Indexmanipulatioun vertrueden. Wat hien dovu géing halen, wéilt hien net soen, well hien net wéilt fluchen, ma wann nach weider um Index soll manipuléiert ginn, misst geschwat ginn a wann net geschwat gëtt, misst et kraachen. Wann d'Politiker all soen, se géingen zum Index stoen, da solle se en net manipuléieren, sou de President vum Landesverband Georges Merenz.

Invité vun der Redaktioun: Georges Merenz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.