Där Meenung ass d'Nora Back, d'Presidentin vum OBGL war en Dënschdeg de Moien eis Invitée vun der Redaktioun.

"Mir brauchen Tripartitten", sou d'Presidentin vum OGBL Nora Back den Dënschdeg de Moien hei op RTL. Opgrond vun der méi héijer Inflatioun ewéi erwaart an dem Kafkraaftverloscht bréicht een dem Nora Back no eng anstänneg Analys vun der Situatioun an differenzéiert Léisungen, eng gerecht Steierpolitik an net eng Indexmanipulatioun. Nodeems den Direkter vum Statec e Méindeg hei op der Antenn sot, et kéint nach virum Enn vum Joer eng weider Indextranche fälleg ginn, fillt sech den OGBL confirméiert, datt d'Decisiounen aus der leschter Tripartite am Mäerz déi falsch gewiescht wieren.

Der Presidentin vum OGBL no géing et "en haarden Hierscht" ginn an déi nächst Tripartite misst dës Kéier seriö preparéiert ginn. D'Nora Back huet Léisunge gefrot fir d'Leit, mee och fir déi Betriber, déi wierklech Hëllef brauchen. Si ass och der Meenung, datt et wichteg wier, datt déi dräi Gewerkschafte virun enger nächster Tripartite nees zesummekommen. Den LCGB an d'CGFP haten d'Mesurë vun Enn Mäerz am Géigesaz zum OGBL matgedroen.

D'Nora Back huet der Regierung virgeworf, Geschichten z'erzielen. Notamment och d'Kritik, datt den OGBL sech fir déck Paien agesat hätt: dat wier komplett aus dem Kontext gerappt ginn. Et wier eng maximalistesch Fuerderung erausgepickt ginn, ouni se mat vill méi krasse Fuerderunge vum Patronat ze vergläichen, ewéi zum Beispill eng Indexmanipulatioun bis 2023.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.