Dat schätzt de President vun der Pensiounskeess. Den Alain Reuter war eisen Invité vun der Redaktioun.

Déi aktiv Populatioun bezilt déi aktuell Pensiounen an et soll nach eppes op d'Säit geluecht ginn. Sou funktionéiert idealerweis de Pensiounssystem, sou de President vun der Pensiounskeess Alain Reuter. Hie war e Mëttwoch de Moien eisen Invité vun der Redaktioun.

De Moment maachen d'Cotisatiounen 24 Prozent aus, 22 Prozent géifen aktuell duergoen. Mä d'Situatioun wäert sech änneren.

2027 wäerten déi 24 Prozent net méi duergoen, fir d'Pensiounen ze bezuelen. Bis 2032 huet een nach e Polster. Dono muss eng Reform gräifen.

An den nächste Jore muss also eng Reform gemaach ginn – déi war an der Vergaangenheet fir 40 Joer gutt -  an nawell riskéieren zukünfteg Generatioune bei de Pensioune méi schlecht ewechzekommen.

Am Conseil economique et social soll diskutéiert ginn, wéi een de Lëtzebuerger Pensiounssystem soll reforméieren.

Vum President vun der Pensiounskeess war et e Mëttwoch de Moien nach d'Informatioun, datt de Steierkredit, deen d'Verréckele vun der Indextranche jo deels kompenséiert, duebel fir den August ausbezuelt gëtt. Well d'Pensioune jo ëmmer am Virfeld iwwerwise ginn, kënnt de Steierkredit vum Juli elo mat der Pensioun vum August.

Invité vun der Redaktioun: Alain Reuter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.