E Mëttwoch de Moie war de President vun der Staatsbeamtegewerkschaft CGFP eisen Invité vun der Redaktioun.

Mam Verréckele vum Index misst elo Schluss sinn, sou de Romain Wolff. Dat um Dag, wou de Statec seng nei Inflatiounsprevisioune presentéiert, aus deene kéint ervirgoen, datt eng weider Indextranche Enn vum Joer schonn nees fälleg gëtt. Eng Tranche ausfale loossen, géing och guer net goen a mat de Steierkreditter kéint een och net éiweg weiderfueren, sou de Romain Wolff. Enn Mäerz hat d'CGFP jo d'Verréckele vun enger Indextranche, mat op der anerer Säit de gestaffelte Steierkreditter matgedroen. Mee deemools hätt ee Chiffere gehat, déi kuerz drop vun der Realitéit iwwerholl gi wieren. Dem Romain Wolff no misst de Compteur elo op Null gesat an nei Verhandlunge gefouert ginn.

Hie geet dovunner aus, datt eng Tripartite Ausgang des Joers ass, spéitstens am November. Eng nächst Tripartite misst a sengen Ae och gutt preparéiert ginn, et misst ee sech Zäit huelen an et dierft net nëmmen ëm den Index goen. Och de Wunnengsmaart mat den héijen Zënse misst e Sujet sinn. Genee sou wéi d'Steieren, wou de CGFP-President gefuerdert huet, datt de Steierbarème un d'Inflatioun ugepasst gëtt. Et misst endlech eppes fir d'Mëttelschicht gemaach ginn.

Verhandlungen iwwert en neie Gehälteraccord fir d'Fonctionnaire stinn och virun der Dier. De Romain Wolff wollt de Gremien e Mëttwoch de Moien net virgräifen, wat d'Staatsbeamtegewerkschaft fuerdert oder och net. An der Vergaangenheet hätt d'CGFP schonn dacks Solidaritéit bewisen, notamment mat der Nullronn beim leschte Gehälter-Accord a mam Tripartite-Accord. Elo wier et och um Patronat, fir Solidaritéit ze weisen, amplaz ewéi rezent nees, reduzéiert Ufanksgehälter beim Staat ze fuerderen.

Invité vun der Redaktioun: Romain Wolff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.