Esou interpretéiert den CSV-Deputéierten déi aktuell politesch Situatioun am Land. De Marc Spautz war e Freideg eisen Invité vun der Redaktioun.

D’Tripartite am Hierscht wäert eng ganz schwéier ginn. Dovunner ass den CSV-Deputéierte Marc Spautz e Freideg de Moien hei op RTL ausgaangen. Dem fréiere Gewerkschaftler no misst se gutt preparéiert ginn, well bei der leschter Enn Mäerz wier dat net de Fall gewiescht. Wéi en neien Accord am Hierscht misst ausgesinn, dat wier net un der CSV ze soen. Mä éiweg Indextranchen no hanne verréckelen, géing net goen, soss wär een op eng Kéier am Joer 2028, sou de Marc Spautz.

Fir den CSV-Deputéierte wier eng Pist, den Index normal auszebezuelen an deene Betriber, déi Schwieregkeeten hunn, d'Méiglechkeet ginn, eng Hëllef vum Staat kënnen unzefroen. Donieft bleift d'CSV der Meenung, datt een eng Upassung vun de Steierbarèmen un d'Inflatioun misst ënnerhuelen. Gläichzäiteg kéint de Staat drop verzichten, seng Tariffer an d'Luucht ze setzen. Als Alternativ zum Tankrabatt huet de Marc Spautz iwwerdeems proposéiert, datt een d'Kilometergeld adaptéiert.

A sengen Ae wier et och keng Schan, wann no engem Joer Adaptatioune missten ënnerholl ginn, mä hie wënscht sech e räsonabelen Kompromëss tëscht Regierung, Patronat a Gewerkschaften. Hie géing d'Gefill awer net lass ginn, datt villes op déi nächst Regierung getässelt gëtt, sou nach de Marc Spautz.

"Ech soen Iech als CSV-Deputéierten an als Marc Spautz, datt een an de Steieren an an der Sécurité sociale ee soll behandelen, wéi een aneren." Esou äntwert de Marc Spautz op d'Fro, ob hien e Problem domadder hätt, wann d'Deputéiert net méi op hir hallef, mä hir ganz Paie versteiert géife ginn.

Iwwregens ass dëst net just de Fall bei den Deputéierten an der Chamber, mä och bei de Regierungsmemberen an de Membere vum Staatsrot.

Invité vun der Redaktioun: Marc Spautz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.