Esou reagéiert d'Generaldirektesch vun Esch2022 op de Verglach mat de Kulturjoren 2007 an 1995. Si war en Dënschdeg eis Invitée vun der Redaktioun.

Een halleft Joer nom Startschoss fir Esch2022 als europäesch Kulturhaaptstad zitt d'Direktesch Nancy Braun e ganz positive Bilan. Si war en Dënschdeg de Moien eis Invitée vun der Redaktioun. Iwwer 80 Prozent vun de Leit, déi un den Eventer deelhuelen, sinn de Sondagë vun Ilres no ganz zefridden. 87 Prozent fannen och, dass et gutt organiséiert ass.

Verschidde Kriticken, déi ufanks a punkto Organisatioun gemaach goufen, wiere begrënnt an dorun hätt een och geschafft a villes adaptéiert. Vill Leit géingen awer och vergiessen, dass een aus zwee Joer Corona-Pandemie erauskoum. Dacks géing och verglach gi mat de Kulturjoren 2007 an 1995 an déi dräi Projete kéint een eigentlech guer net matenee vergläichen.

"Eis Aufgab ass et net, elo nach eng Kéier Rockhalen ze bauen a Philharmonien ze bauen an Theateren", sou d'Nancy Braun. Mä et géing een domadder schaffen an d'Zil wier et, fir d'Kultur accessibel ze maache fir all Mënsch an d'Leit aktiv deelhuelen ze loosse mat engem Programm, wou fir jiddereen eppes derbäi ass. Mëttlerweil ass d'Kulturjoer jo schonns an der Hallschent ukomm, mä nach wier vill op der Lee, sou d'Direktesch vun Esch2022 Nancy Braun.

Invité vun der Redaktioun: Nancy Braun

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.