En Donneschdeg de Moie war den neie President vun der Fédération Luxembourgeoise de l'Alimentation et de la Distribution eisen Invité vun der Redaktioun.

Déi aktuell Kris vun héijen Energiepräisser bis bei d'Inflatioun si sportlech, ma an 29 Joer am Secteur wier d'Pandemie déi schlëmmste Kris gewiescht, sot de Georges Eischen als eisen Invité vun der Redaktioun. De President vum Brancheverband vun de grousse Liewensmëttelgeschäfter (FLAD) a Gerant vun der Provençale rechent mat weideren Haussen am Hierscht zum Beispill bei de Gromperen. Dës wiere mat méi deierem Dünger traitéiert ginn, Traktere wiere mat méi deierem Diesel gefuer an duerch d'Dréchent kéim och nach manner Rendement eraus, sou dass an den nächsten 8-12 Méint d'Fritten an d'Gromperen am Allgemenge méi deier ginn, erkläert de Gerant vun der Provençale.

Déi grouss Well vun Haussen an der Liewensmëttelbranche wier hannert eis, déi lescht 6 Méint hätt een nach ni esou een Tsunami vu Präisännerunge gehat, erkläert de President vun der FLAD.  Et wier awer net esou, dass de Produzent sech elo d'Täsche géif voll stiechen: villméi misst ee ganz einfach déi méi héich Produktiounskäschte weiderginn, fir iergendwou en deels normaalt Resultat kënnen ze maachen, erkläert de Georges Eischen.

Dass de Gas méi deier gëtt, ass net d'Haaptsuerg an der Branche vun der Liewensmëtteldistributioun, mee et gëtt eng reell Angscht, dass iergendwann net méi genuch Gas do ass. A verschidde Produktiounsberäicher wier ee wierklech dorop ugewisen. Et wéilt een awer och kloer en Deel vun der Léisung sinn, fir op EU-Niveau d'Energie ëm 15% ze reduzéieren. Den Ament géinge Killtruen a sengem Betrib op -22 Grad lafen, mee déi kéinten och mat -20 Grad fonctionéieren oder vläicht souguer mat -19 Grad. Do wier een optimistesch, fir d'Energie effektiv kënnen ëm 15 Prozent ze reduzéieren.

De gréissten Defi fir d'Zukunft gesäit de Gerant vun der Provençale awer an der Penurie un Aarbechtskräften. Ëmmer manner Leit géingen op den Aarbechtsmaart kommen an allgemeng géinge vill Leit am Betrib verluer goen, duerch d'Ëmsetze vun ëmmer méi komplexe Gesetzgebungen. Manner administrativ Prozedure kéinten hëllefen, d'Leit, déi een huet, do anzesetzen, wou ee se wierklech braucht, sou nach de Georges Eischen.

Invité vun der Redaktioun: Georges Eischen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.