E Méindeg de Moie war den Directeur adjoint vum Waasserwirtschaftsamt eisen Invité vun der Redaktioun.

Dat dréchent Weeder aus de leschte Wochen a Méint huet och seng Spuere bei de Peegelstänn vun de Flëss a Baachen hannerlooss, dat confirméiert de Luc Zwank, Directeur adjoint vum Waasserwirtschaftsamt als eisen Invité vun der Redaktioun um Méindeg. Trotzdeem géing et keng Gefor fir d'Drénkwaasserversuergung ginn.

"Et ass eng Situatioun, déi mer esou bis ewell ganz rar gesinn hunn", esou de Luc Zwank, Directeur adjoint vum Waasserwirtschaftsamt zur Situatioun vun de Flëss a Baachen zu Lëtzebuerg. Hie war e Méindeg de Moien eisen Invité vun der Redaktioun. 2018 wier et och dréche gewiescht, mee deemools wieren déi niddreg Peegele vun de Baachen a Flëss eréischt am Spéitsummer festgestallt ginn. Well sech déi Situatioun viru 4 Joer nach bis an den Hierscht eragezunn hätt, misst een och dëst Joer mat engem änlechen Zenario rechnen. D'Drénkwaasserversuergung wier trotzdeem net a Gefor.

Luc Zwank: "Mir hunn de Stauséi als Uewerflächegewässer fir d'Drénkwaasserproduktioun. Do ass eng Waassergestioun virginn, déi et erméiglecht, fir d'Drénkwaasserproduktioun oprecht ze erhalen. Do ginn et Limitten, wéi vill Waasser hannen aus der Mauer muss rauslafen, fir der Sauer genuch Waasser ze ginn. An dann a Funktioun dovun, wéi vill nach an de Stau eraleeft, sinn aner Notzunge wéi zum Beispill d'Stroumproduktioun am Summer reduzéiert oder ganz gestoppt."De Message, kee Waasser onnéideg ze verbëtzen, gëllt awer weiderhin. D’Phase de vigilance gouf zwar Ufank August opgehuewen, kéint allerdéngs nees ausgeruff ginn, wann d’Vakanz bis eriwwer ass, d’Leit nees all doheem sinn a rëm op alle Chantiere geschafft gëtt. Generell soll ee just dat Drénkwaasser benotzen, dat ee wierklech brauch. Och kleng Ännerungen am Alldag kënnen ee groussen Impakt hunn.

Luc Zwank: "Wann een e Gaart huet, deen een netzt, soll een oppassen, datt een et moies oder owes mécht, net bei der grousser Hëtzt, wou alles verdonst. Och wierklech bei de Wuerzelen netzen an net mam grousse Rasensprenger, wou dee gréissten Deel vum Waasser verdonst."Mat Bléck op d'Drénkwaasser gëtt gepréift, wéi ee bestoend Ressourcen, wéi Grondwaasser aus déiwe Buedemschichten, rëm zougänglech maache kann an ob d'Waasser aus der Musel genotzt ka ginn. Déi aktuell Dréchent huet iwwerdeems och als Impakt, datt de Buedem bis an eng grouss Déift eran immens dréchen ass. Dat féiert dozou, datt wann et bis reent, d’Waasser net direkt gutt versickere kann. Bei Staarkree wieren da lokal Iwwerschwemmunge wéi beispillsweis 2016 am Ärenzdall respektiv 2018 am Mëllerdall net auszeschléissen.

Invité vun der Redaktioun: Luc Zwank

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.