Dat sot den LCGB-President en Dënschdeg de Moien. Hie war eisen Invité vun der Redaktioun.

"Den Tripartite-Accord vu Mäerz ass ënnert de Konditioune vun deemools ënnerschriwwe ginn. Et war an eisen Aen de bescht-méiglechsten zu deem Zäitpunkt." Dat sot de Patrick Dury en Dënschdeg de Moien als eisen Invité vun der Redaktioun.

Den LCGB-President erënnert, dass an deem Accord och festgehale gouf, dass falls eng weider Indextranche dëst Joer sollt erfalen, d'Tripartite nees muss zesummekommen. Dat wier op Propos vun de Gewerkschaften an den Accord geschriwwe ginn an dorobber géif een och halen.

Obwuel d'Méiglechkeet vu méi Indextranchen also schonn am Fréijoer diskutéiert ginn ass, wiere keng eventuell Léisungen dofir opgestallt ginn. Zil wier et, dat an enger Tripartite ze beschwätzen, am Viraus hätt een dat net kënne maachen.

Ob déi nächst Tranchen ëmmer nees verréckelt ginn, wat sech op puer Joer géing strecken, oder ob et eng Méiglechkeet wier, zwou oder méi Tranchen zesummen auszebezuelen, wollt de Patrick Dury net kommentéieren. Et wéilt ee keng Verhandlungen iwwer d'Presse féieren.

Fir en LCGB ass awer kloer, dass den Index a senger Integralitéit misst bestoe bleiwen.

Mat der Regierung wéilt een en Donneschdeg emol eng Bestandsopnam maachen. Deen Ament wäert d'Regierung jo d'Gewerkschaften an d'Patronat fir Eenzelgespréicher gesinn, en Vue vun enger méiglecher Tripartite.

D'Ofséchere vun den Aarbechtsplazen a vun der Kafkraaft géif dobäi fir d'Gewerkschaft ganz uewen op der Agenda stoen. Doriwwer eraus huet de Patrick Dury betount, dass den LCGB fir den Index steet. D'Tranche, déi am Juli erfall ass, gouf jo op Abrëll 2023 verréckelt an duerch e Steierkredit ersat, deen op d'Pai gestaffelt ass. Dat wier d'Léisung an enger Kris gewiescht, esou de Patrick Dury. Dowéinst wier dës Mesure och net als Geleeënheet ze huelen, fir och den Index ze staffelen. Sozial Mesuren an Ëmverdeelung sollt éischter iwwer d'Steierpolitik gemaach ginn an net iwwert den Index. Besonnesch fir Leit, déi kee Kollektivvertrag hunn, wier den Index wichteg, fir d'Kafkraaft bei enger Präisdeierecht bäizebehalen.

Et wäert ee sech och mat der CGFP a mam OGBL am Virfeld vun de bilaterale Gespréicher mat der Regierung en Donneschdeg gesinn. Et géing ee gemeinsam an déi Reunioun eragoen an et wéilt een och am Léifsten zu drëtt en Accord mat der Regierung fannen. An deem Geescht geet den LCGB op alle Fall an dat Gespréich eran, sou de Patrick Dury. De President vum chrëschtleche Gewerkschaftsbond huet och nach emol bedauert, dass ee bei der leschter Tripartite Enn Mäerz keen Accord zu drëtt fonnt hätt.

Invité vun der Redaktioun: Patrick Dury

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.