Dat sot de President vun der Union des Entreprises Luxembourgeoises (UEL). Hie war e Mëttwoch eisen Invité vun der Redaktioun.

Et hätt een an der leschter Tripartite schonn iwwert den Zenario diskutéiert, wann de Krich méi laang géing daueren a wa sech d'Situatioun géing verschlechteren. Dat huet den UEL-President Michel Reckinger e Mëttwoch de Moien als eisen Invité vun der Redaktioun gesot. En Donneschdeg gesäit d'Regierung jo an Eenzelgespréicher noeneen d'Gewerkschaften an d'Patronat, en vue vun enger méiglecher nächster Tripartite-Ronn. D'Verréckele vun der Indextranche vu Juli hätt och schonn aus der Siicht vum Patronat hir Wierkung gewisen. Ma et géing een awer scho gesinn, dass eng Rezessioun am Raum steet. Notamment gesäit ee schonn, dass d'Tauxe fir d'Prête bei der Bank ferm geklomme sinn. Et géingen dowéinst forcement manner Prêten accordéiert ginn.

D'Inflatioun trëfft awer net just d'Stéit ganz staark, mee och d'Betriber. Et kann net fir jiddereen alles kompenséiert ginn, esou nach de Michel Reckinger. Ma et sollt versicht ginn, "aus dem Bësch ze kommen".

Bei der leschter Tripartite Enn Mäerz hat d'Patronat amplaz vun de Steierkreditter eng Prime unique an d'Spill bruecht. "Defiscaliséiert Primmen", wéi et de Michel Reckinger genannt huet, kéint een ëmmer am Hannerkapp behalen, dat géing de Leit nämlech direkt zegutt kommen. Mee dat wier eng Mesure fir eng kuerzfristeg Phas.

Verschidden aner Iddien, notamment fir de vulnerabele Betriber ze hëllefen, géingen et scho ginn, mee fir déi ze konkretiséieren, misst ee sech bei enger Tripartite zesummesetzen. De Betriber sollt dem Michel Reckinger no méi selektiv gehollef ginn, well net jiddereen nämmlecht betraff wier. Dat nämmlecht géing awer och fir d'Stéit gëllen.

Eng Indextranche vu Juli gouf op Abrëll 2023 verréckelt. Wat mat enger eventueller nächster Indextranche kéint geschéien, dozou wollt sech den UEL-President net äusseren. "Dofir komme mir jo elo zesummen, fir dat ze beschwätzen".

Aus der Siicht vum Patronat wier et och wichteg ze kucken, wéi de Kafkraaftverloscht ka kompenséiert ginn, mee och, wéi d'Mesurë bezuelt ginn, respektiv wie se bezilt. Dowéinst wéilt een an der Bestandsopnam och Donnéeë vun der Finanzministesch Yuriko Backes mat afléisse loossen.

Mam Energieminister Claude Turmes wier een och schonn a Gespréicher. Am Wanter erwaarde sech d'Betriber nämlech och eng Hausse vun den Energiepräisser, wat dann nach emol en Impakt op d'Kafkraaft wäert hunn.

Invité vun der Redaktioun: Michel Reckinger

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.