En Donneschdeg de Moie war d'Direktesch vum Departement Aide et Santé sociale vum Roude Kräiz eis Invitée vun der Redaktioun.

Den Ënnerscheed par rapport zu soss ass deen, dass nach ni esouvill Leit beieneen heihinner komm sinn. Dat sot d'Nadine Conrardy vun der Croix-Rouge en Donneschdeg de Moien als eis Invitée vun der Redaktioun. 4.500 ukrainesch Flüchtlinge sinn zanter dem Ufank vum Ukrain-Konflikt an de Grand-Duché komm.

Den ONA hat decidéiert, dass zousätzlech Strukturen hu missen opgemaach ginn, fir déi grouss Demande bewältegt ze kréien. D'Solidaritéit wier awer och grouss gewiescht an et hätte sech ganz vill privat Stéit gemellt, fir Leit bei sech opzehuelen. Dat wier och nach ëmmer esou, och wann een et manner an der Ëffentlechkeet géif mierken, well allgemeng manner driwwer geschwat géif ginn, seet d'Nadine Conrardy.

Eng 550 Leit wieren an de Strukturen, déi d'Croix-Rouge encadréiert. Weider 500 géifen entweder bei private Leit wunnen oder a Logementer, déi vu private Leit zur Verfügung gestallt goufen a wou d'Croix-Rouge sech och ëm den Encadrement këmmert.

An de meeschte Fäll wier de Mann aus der Famill net mat geflücht, erkläert d'Nadine Conrardy. Et wieren also virun allem Frae mat Kanner, déi an de leschte Méint hei am Land ukomm sinn. Wéi laang d'Leit kënnen hei bleiwen, géif och vun der EU-Decisioun ofhänken, wat hire Statut ugeet. Bis d'Fréijoer d'nächst Joer leeft hire spezielle Status. Wat de Krich méi laang dauert, dierft deen Datum awer sécherlech verlängert ginn.

Et wieren awer och vill Ukrainer, déi antëscht scho rëm zréckgaange wieren oder an aner Länner weidergezu sinn.
Allgemeng géif et nach ëmmer e Problem vun den Opnamstrukture ginn, déi iwwerbesat wieren. Dat hätt domat ze dinn, datt d'Leit, déi de Statut kruten, awer net aus de Strukturen erauskomme wéinst dem Logementsproblem am Land, seet d'Nadine Conrardy vum Roude Kräiz.

D'Croix-Rouge sicht iwwerdeems aktuell no neie Mataarbechter, dorënner Educateuren, Infirmieren, Assistants sociales a Psychologen.

Invité vun der Redaktioun: Nadine Conrardy

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.