Dat sot de President vun der Federatioun vun de Lëtzebuerger Reesagencen. Hie war e Méindeg de Moien eisen Invité vun der Redaktioun.

D'Geschäft vun de Reesagencen ass a Prozenter ausgedréckt 30 bis 35% besser drun ewéi 2020. "Mä eis Referenzperiod ass 2019, a fir bis dohi feelt nach e bësselchen", sou de President vun der Federatioun vun de Lëtzebuerger Reesagencen, de Fernand Heinisch, e Méindeg de Moien hei op RTL.

Déi méi wäit Destinatiounen an d'Croisièrë géinge just lues nees ulafen a Geschäftstourismus wier och nach ëmmer wäit ënnert dem Niveau vu virun der Pandemie. An dat géing ee spieren.

Zanter dem 30. Juni kréien d'Reesagencë keng finanziell Corona-Hëllefe méi. Dat wier dem Fernand Heinisch awer och gutt esou. Hien ass ganz zefridde mam zoustännege Ministère an et hätt keng Agence mussen zoumaachen.

Wat Zukunft ugeet, sot de Fernand Heinsch: "Mir si gebueren Optimisten an der Tourismus-Branche". D'Präisser fir Vakanzen dëse Wanter wieren trotz Inflatioun an héijen Energiepräisser fir den Ament mol nach net méi deier ginn. Mä wann d'Präisser nach méi klammen, wéisst een net, "wou et higeet".

Invité vun der Redaktioun: Fernand Heinisch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.